तौलिहवा, माघ २५ गते । कपिलबस्तुमा पशुमा लाग्ने खोरेत रोगविरुद्धको खोप अभियान सञ्चालन गरिएको छ । भेटेरिनरी अस्पताल तथा पशु सेवा विज्ञ केन्द्र कपिलबस्तुले तौलिहवामा राखेको खोरेत रोग उन्मुलन अभियान भयाक्सीनेटर अभिमुखीकरण कार्यक्रममा सो जानकारी गराइएको हो ।
केन्द्रका प्रमुख डा. प्रवेज आलमका अनुसार लुम्बिनी प्रदेश सरकारले आर्थिक वर्ष ०७६।०७७ देखि नै खोरेत रोग नियन्त्रणका लागि अभियानको रुपमा कार्यक्रम सञ्चालन गरिएको बताउनुभयो । जसअन्र्तगत चालु आर्थिक वर्षमा कपिलबस्तु जिल्लामा पहिलो चरणमा ५० हजार पशुहरुमा खोरेत विरुद्धको खोप अभियानको सुरुवात गरिएको उहाँले बताउनुभयो।
साथै अर्को चरणको अभियान सञ्चालन गर्न थप ५० हजार पशुहरुमा खोप लगाउने योजना रहेको उहाँको भनाइ छ । उहाँले भन्नुभयो, “खोप लगाउनको लागि ५२ जना भयाक्सीनेटरहरुको परिचालन गरिएको छ ।” महामारीका रुपमा रहेको खोरेत रोगको नियन्त्रण गरी क्षति न्यूनीकरण गर्न सरकारी योजना अनुसार यो अभियान चलाइएको प्रमुख आलमले बताउनुभयो ।
खोप लगाए वापत भयाक्सीनेटरहरुले प्रति पशु १५ रुपियाँ र सफ्टवेयर ईन्ट्री गरेबापत रु १० गरी पच्चिस रुपियाँ पाउने छन् । भयाक्सीनेटरहरु कृषकरुको गोठमै गएर निःशुल्क रुपमा खोप लगाइने छ ।
पशु पन्क्षि तथा मत्स्य विकास निर्देशनालयका प्रमुख लोकराज भुसालका अनुसार खोरेत रोग भाइरसका कारण खुर भएको जनावरहरुबाट खोरेत रोग फैलिने गरेको बताउनुभयो। खोरेत रोग खुर भएका गाई, भैँसी, गोडा लगायतका पशुहरुको स्वास्थ्यमा गम्भिर असार पार्ने गरेको उहाँको भनाइ छ । उहाँले खोरेत रोग नियन्त्रणका लागि प्रदेश मै बृहत् अभियान विगत वर्षदेखि नै सञ्चालन हुँदै आएको बताउनुभयो ।
जिल्लाको बाणगंगा नगरपालिकामा छ हजार ५ साय, शिवराजमा ५ हजार ५ सय, महाराजगंज, बुद्धभुमि र कृष्णनगर नगरपालिकामा पाँचपाँच हजार, कपिलबस्तुमा ४ हजार ५ सय खोरेत खोप वितरण गरिएको छ । त्यस्तै, जिल्लाको मायादेवि चार हजार ५ सय, शुद्धोधन र विजयनगर गाँउपालिकामा पाँच पाँच हजार र यशोधरा गाँउपालिकामा चार हजार खोप पठाइएको छ ।
खोरेत रोग लागेको पशुहरुलाई ज्वरो, मुख, मजल तथा थुन वरिपरी फोका, खुरको कापमा घाउ, खान रुचि खट्नु, खान नसक्नु, झोक्राउनु, झुसिलो देखिनु, मुखबाट ¥याल काढ्नु लगायतका लक्ष्णहरु देखा पर्ने गरेका छन् । खासगरी खोरेत रोग सिधा सम्पर्क, हावामा फैलिएका जनावरको श्वास प्रश्वास, दुध, विर्य, दानामा प्रयोग भएको संक्रमित एनिमल प्रोटिनका श्रोतहरुबाट फैलिने गरेको पशु प्राविधिकहरुको भनाइ छ ।
