पाँच बर्षे रोजगार रणनिति योजना बनाउदैं बुद्धभुमि

तौलिहवा (कपिलबस्तु), जेठ १८ गते । जिल्लाको बुद्धभुमि नगरपालिकाले पाँच बर्षे रोजगार रणनिति योजना बनाउन लागेको छ । रोजगार रणनितिक योजना निर्माण गर्न प्रारम्भिक मस्यौदा तयारी बैठक सम्पन्न गरिएको हो । नगरपालिकाभित्र रोजगारीको अवसर सिर्जना गरी बढ्दो बेरोजगारी र गरीबीलाई न्यूनिकरण गर्ने उद्देश्यले रोजगार रणनिति योजना बनाउन लागिएको छ ।
नगरपालिकाबाट प्रदान गर्ने अनुदानहरुलाई व्यवसाय संग जोडेर रोजगारीको सिर्जना गर्न सकिने वडा नं. ४ का वडाध्यक्ष सुशिल चौधरीले बताउनुभयो । पालिकाले प्रदान गर्ने सिप मुलक तालिम दिइएर हुदैन उहाँहरुलाई त्यही प्रकृती अनुसार व्यवपार व्यवासय गर्न अनुदानको व्यवस्था गर्नु पर्ने उहाँको भनाई छ ।
बुद्धभुमि नगरपालिकाका रोजगार संयोजक रविन चौधरीका अनुसार सुरक्षित, मर्यादित र श्रमको सम्मान गर्ने खालको रोजगारी सिर्जना गरेर स्वारोजगार मार्फत यहाका युवाहरुलाई आफ्नै पालिकामा बस्ने बातावरण मिलाउने बताउनुभयो ।
पाँच आर्थिक वर्षमा सम्पादन हुने विभिन्न रोजगार सम्बन्धि क्रियाकलाप, त्यसका लागि आवश्यक लागत र सोबाट प्राप्त हुने अपेक्षित उपलब्धिको आकंलन पनि रणनीतिक योजनामा गरिएको बुद्धभुमि नगरपालिका नगर प्रमुख केशब कुमार श्रेष्ठले बताउनुभयो । विभिन्न रोजगारदाता तथा सरोकारवालाहरुसँग छलफल गरि प्राप्त सुझावहरूलाई समेटेर रोजगार रणनीति योजनालाई अन्तिम स्वरूप दिने उहाँको भनाइ छ ।
रोजगार रणनीतिक योजनामा आन्तरिक रोजगारी सिर्जना हुने क्षेत्रको विस्तार गर्ने, बेरोजगारलाई सीप, रोजगारदातालाई सीपयुक्त जनशक्ति, बैदेशिक रोजगारलाई उपलब्धिमूलक र फर्केका व्यक्तिको अनुभवलाई उपयोग, रोजगारमूलक सेवालाई उपलब्धिमूलक र रोजगारमैत्री गरी चार वटा स्तम्भ राखिएको छ ।
कार्यक्रममा उद्योगी, व्यवसायी, होटल व्यवसायी, इट्टा उद्योगी, निर्माण व्यवसायी, दुधडोरी उद्योग, तथा विभिन्न संघसंस्थाको प्रतिनिधि एवम् प्रमुखको सहभागिता रहेको थियो ।