शुद्धोधनको बगदी स्थित सनलाइट विद्यालय प्रविधिमैत्री बन्दै

कपिलबस्तु, जेठ १२ गते । जिल्लाको शुद्धोधन गाउँपालिका–१, बगदी स्थित सनलाइट इङ्गलिश बोर्डिङ स्कुलले प्रविधिमैत्री शैक्षिक प्रणालीको सुरुआत गरेको छ । विद्यालय व्यवस्थापनले नयाँ शैक्षिक सत्रदेखि विद्यार्थी, अभिभावक तथा शिक्षकहरूलाई लक्षित गर्दै अत्याधुनिक प्रविधिको प्रयोगमा आधारित सूचना व्यवस्थापन प्रणाली लागू गरेको छ ।
विद्यालयका प्रबन्ध निर्देशक सच्चिदानन्द त्रिपाठीका अनुसार अबदेखि प्रत्येक अभिभावकले आफ्ना बालबालिकाको सम्पूर्ण शैक्षिक विवरण र गतिविधिहरू घरमै बसेर मोबाइल एप मार्फत हेर्न सक्ने बताउनुभयो ।
निर्देशक त्रिपाठीले भन्नुभयो “बच्चा विद्यालय प्रवेश गरेदेखि कक्षा कोठा, हाजिरी, गृहकार्य, पाठ योजना, शिक्षक विवरण, पुस्तकालय प्रयोग, परीक्षा तालिका, नतिजा र विद्यालयका सूचना आदिसमेत अब अभिभावकको पहुँचमा हुनेछ ।”
विद्यालयका पाँचवटै स्कुल बसहरूमा अब जीपीएस प्रणाली जडान गरिएको छ, जसअनुसार बसहरूको रियल टाइम लोकेसन तथा बस स्टपहरूको जानकारी पनि अभिभावकले मोबाइलमार्फत प्राप्त गर्न सक्नेछन् । उक्त प्रविधिसम्बन्धी व्यवस्थाको जिम्मा लिएकी विद्यालयकी प्रधानाध्यापक संगीता पाण्डेयका अनुसार, सवारी साधन सुरक्षाको दृष्टिले पनि यस प्रविधिले महत्त्वपूर्ण भूमिका खेल्नेछ ।
प्रधानाध्यापक पाण्डेयले भन्नुभयो “विद्यालयको प्रविधि अनुकूलता न केवल सूचना प्रवाहका लागि, तर शैक्षिक पारदर्शिता र विद्यार्थीको उत्तरदायित्व वृद्धिका लागि पनि उपयोगी हुने विश्वास लिएको छौं ।”
विद्यालयले आगामी दिनमा सूचना प्रविधि मात्र नभई प्राविधिक शिक्षालाई समेत समावेश गर्ने योजना अघि सारेको छ । प्रबन्ध निर्देशक त्रिपाठीका अनुसार, बदलिँदो शैक्षिक प्रणालीसँग समन्वय गर्दै अब विद्यालयले सीपमूलक तथा प्राविधिक शिक्षालाई समेत प्राथमिकता दिनेछ ।
प्रविधिमा आधारित शिक्षाको नयाँ युगतर्फको यात्रा
सनलाइट इङ्गलिश बोर्डिङ स्कुलले प्रविधिलाई शैक्षिक प्रणालीमा एकीकृत गरेर शिक्षा क्षेत्रमा एक उदाहरणीय अभ्यासको सुरुआत गरेको छ । प्रविधिको प्रभावकारी प्रयोगले विद्यार्थीको शैक्षिक प्रगति ट्र्याक गर्न, शिक्षकको कार्य क्षमता मूल्याङ्कन गर्न र अभिभावकलाई विद्यालय गतिविधिमा संलग्न गराउन सहयोग पुग्ने अपेक्षा गरिएको छ ।
विद्यालय व्यवस्थापनका अनुसार, प्रविधिको सदुपयोग गर्दै गुणस्तरीय शिक्षा प्रदान गर्नु र विद्यार्थीलाई २१औँ शताब्दीका सीपहरूसँग सुसज्जित बनाउनु उनीहरूको प्रमुख लक्ष्य हो ।