आशा अधिकारी
कपिलवस्तु, असोज ७ । कपिलवस्तु नगरपालिकाको कृषि विकास बैंकदेखि महिता जाने बाटो क्षेत्रमा वृहत वृक्षारोपण कार्यक्रम सम्पन्न भएको छ।
वातावरण संरक्षण र नगरलाई हरियाली बनाउन उद्देश्यले कार्यक्रमको आयोजना गरिएको हो। कार्यक्रममा प्रमुख जिल्ला अधिकारी दिलकुमार तामाङ, कपिलवस्तु नगरपालिकाका नगरप्रमुख सुदिप पौडेल, वडा नं। १ का वडाध्यक्ष मोहम्मद जाहिद खाँ, वडा नं। ३ का वडाध्यक्ष प्रकाश गैरे, सशस्त्र प्रहरी उपरीक्षक, तौलिहवा उद्योग वाणिज्य सङ्घका अध्यक्ष गयादिन कुर्मी लगायतको सहभागिता रहेको थियो।
कार्यक्रमको अध्यक्षता न्यू रोड टोल विकास समितिका अध्यक्ष देवेश जयसवालले गर्नुभएको थियो भने सञ्चालन सचिव टमलाल खनालले गर्नुभएको थियो। कार्यक्रमलाई सम्बोधन गर्दै प्रमुख जिल्ला अधिकारी तामाङले वृक्षारोपण केवल आजको कार्यक्रममा सीमित नराखी यसको संरक्षणमा सबैले जोड दिनुपर्ने बताए। उनले वातावरणीय सन्तुलन कायम राख्न प्रत्येक नागरिकको भूमिका महत्वपूर्ण हुनेमा जोड दिए।
त्यस्तै, नगरप्रमुख सुदिप पौडेलले नगरलाई हरियाली र वातावरणमैत्री बनाउन नगरपालिकाले निरन्तर अभियान चलाइरहेको उल्लेख गर्दै यस अभियानमा स्थानीयवासीको सहकार्य आवश्यक हुने बताए।
कार्यक्रममा प्राविधिक सहयोग राजेशकुमार सैनी र अर्जुन अर्याल रहेको थियो।
