काठमाडौँ, कात्तिक ११ गते। निर्वाचन आयोगले फागुन २१ गते हुन गइरहेको प्रतिनिधिसभा सदस्य निर्वाचन, २०८२ को पर्यवेक्षण गर्न चाहने राष्ट्रिय संस्थालाई निवेदनका लागि आह्वान गरेको छ।
आयोगले मङ्गलबार एक सूचना जारी गर्दै १५ दिनभित्र निर्वाचन निर्देशिका, २०७९ को अनुसूची–२ बमोजिमको ढाँचामा निवेदन दिन सम्बन्धित सबैका लागि जानकारी गराएको छ।
पर्यवेक्षण अनुमतिका लागि सङ्लग्न गर्नुपर्ने कागजात संस्था दर्ताको प्रमाणपत्रको प्रतिलिपी, संस्थाको विधानको प्रतिलिपी, संस्था नवीकरण भएको निस्साको प्रतिलिपी, संस्था कार्य समितिका पदाधिकारीको नामावली, राष्ट्रिय अन्तर्राष्ट्रिय निर्वाचन पर्यवेक्षणको अनुभव भए सोको प्रमाणपत्र, पर्यवेक्षण सम्बन्धमा संस्थाले तयार पारेको ब्रोसर, पुस्तिका, निर्देशिका वा अन्य कुनै प्रकाशन भए सोको प्रतिलिपी र पहिले निर्वाचन पर्यवेक्षण गरेको भए आयोगमा निर्वाचन पर्यवेक्षण प्रतिवेदन बुझाएको प्रतिवेदनसहित निवेदन दिन आयोगले आह्वान गरेको छ।
काठमाडौँ उपत्यकाको हकमा निर्वाचन आयोगमा र अन्य जिल्लाको हकमा सम्बन्धित प्रदेश निर्वाचन वा जिल्ला निर्वाचन कार्यालयमा निवेदन दिन सकिने र निवेदनको नमुना आयोगको वेबसाइटमा राखिएको आयोगले जनाएको छ।
