उपचारका क्रममा निधन भएका पत्रकार दिनेश सिटौलाको शवको पोस्टमार्टम गरिने भएको छ। अन्त्येष्टिपूर्व पोस्टमार्टम गर्नुपर्ने प्रहरीको सुझावपछि परिवार त्यसका लागि सहमत भएको हो। ग्राण्डी अस्पतालबाट पोस्टमार्टमका लागि सिटौलाको शव टिचिङ अस्पतालतर्फ लगिएको छ।
अस्पतालले ब्रेन ह्यामरेजका कारण सिटौलाको निधन भएको जनाएको छ। अस्पतालले आधिकारिक रूपमा कारण खुलाइसकेको भन्दै परिवारले सुरुमा पोस्टमार्टम नगराउने अडान लिएका थिए। तर, भविष्यमा कुनै कानुनी प्रक्रिया अघि बढाउनुपर्ने अवस्था आएमा पोस्टमार्टम रिपोर्ट आवश्यक पर्न सक्ने स्पष्ट पार्दै डीएसपी नवराज पोखरेलले परिवारलाई बुझाएपछि उनीहरू पोस्टमार्टमका लागि राजी भएका हुन्।
राष्ट्रिय स्वतन्त्र पार्टीका वरिष्ठ नेता बालेन्द्र साहको टोलीसँग अछाम पुगेका पत्रकार सिटौला अचानक बेहोस भएर ढलेपछि उपचारका लागि काठमाडौं ल्याइएका थिए। भेन्टिलेटरमा राखेर उपचार गरिए पनि स्वास्थ्य अवस्थामा सुधार आउन सकेन र आज चिकित्सकले उनलाई मृत घोषणा गरेका हुन्।
