कपिलवस्तु । नेपाली कांग्रेस महाराजगंज नगरकार्य समितिको आयोजनामा नगर भेला तथा अन्तरक्रिया कार्यक्रम सम्पन्न भएको छ। कार्यक्रम नगर सभापति राम अचल कुर्मीको अध्यक्षता तथा जिल्ला सहसचिव वजिह अर्शदको सञ्चालनमा भएको हो।
कार्यक्रममा बोल्दै नेपाली कांग्रेस कपिलवस्तु क्षेत्र नं. २ का प्रतिनिधि सभा सदस्यका उम्मेदवार सुरेन्द्रराज आचार्यले वर्तमान निर्वाचन देशको अस्तित्व, लोकतन्त्र र संविधानको संरक्षणसँग प्रत्यक्ष रूपमा जोडिएको महत्वपूर्ण निर्वाचन भएको बताउनुभयो। उहाँले अधुरा विकास निर्माणका कार्य पूरा गर्न आफ्नो उम्मेदवारी रहेको स्पष्ट गर्नुभयो।
आचार्यले जनताबाट पाँच वर्षका लागि निर्वाचित भए पनि विशेष परिस्थितिका कारण तीन वर्षमै पुनः निर्वाचन हुन लागेको उल्लेख गर्दै विगत कार्यकालमा केही कमी कमजोरी हुन सक्ने स्वीकार गर्नुभयो। मन्त्री रहँदा कपिलवस्तुका तीनै निर्वाचन क्षेत्रमा शिक्षा र सिँचाइ क्षेत्रका योजनालाई प्राथमिकतामा राखेर काम अघि बढाइएको उहाँको भनाइ थियो।
उहाँका अनुसार सिँचाइ सुधारका लागि डिप पोरिङ तथा बाणगंगा सिँचाइ आयोजनाको मर्मतसम्भारका लागि १ अर्ब २५ करोड रुपैयाँ बजेट विनियोजन गरिएको थियो, जसअन्तर्गतका योजनाहरू हाल पनि निरन्तर रूपमा कार्यान्वयन भइरहेको छ।
कार्यक्रममा महाराजगंज नगरपालिकाका नगर प्रमुख तथा नेपाली कांग्रेसका जिल्ला सभापति अब्दुल कलामले तीनवटै निर्वाचन क्षेत्रमा कांग्रेसका उम्मेदवारलाई विजयी गराउन अपिल गर्नुभयो। उहाँले कपिलवस्तुमा नेपाली कांग्रेसले समावेशी उम्मेदवारलाई अघि सारेको उल्लेख गर्नुभयो।
त्यसैगरी कार्यक्रममा पूर्व पार्टी सभापति एवम् नेपाली कांग्रेसका नेता सुधाकर पाण्डेले लोकतन्त्र र नागरिक अधिकार संरक्षणका लागि कांग्रेसका उम्मेदवारलाई विजयी गराउन आग्रह गर्नुभयो। पूर्व मन्त्री सहासराम यादवले निर्वाचन परिणाम कांग्रेसकै पक्षमा आउने दाबी गर्दै कार्यकर्तालाई ढुक्क भएर चुनावी तयारीमा जुट्न आग्रह गर्नुभयो।
कार्यक्रममा स्थानीय नेता, कार्यकर्ता तथा सर्वसाधारणको उल्लेखनीय सहभागिता रहेको थियो।
