“बदलियो कांग्रेस, अब देश बदल्ने जिम्मा हाम्रो” : आचार्यको प्रतिबद्धता

कपिलवस्तु, फागुन १२ गते । कपिलवस्तु क्षेत्र नम्बर २ का प्रतिनिधि सभा सदस्यका उम्मेदवार सुरेन्द्र राज आचार्य ले जनताको विश्वास र सक्रिय संगठनकै बलमा निर्वाचन जित्ने दाबी गर्नुभएको छ। घरदैलो तथा जनआशीर्वाद कार्यक्रमका क्रममा उहाँले विगतमा गरेका प्रतिबद्धता र जनताबाट प्राप्त सुझावलाई आत्मसात गर्दै अघि बढ्ने बताउनुभयो।
उहाँले हरेक वडामा पार्टीको बलियो संगठन रहेको र भातृ तथा शुभेच्छुक संगठनहरू सक्रिय रूपमा परिचालित रहेकाले निर्वाचन परिणाम आफ्नो पक्षमा आउने विश्वास व्यक्त गर्नुभयो। “हामी जनताको घर–घरमा पुगिरहेका छौँ, जनताका समस्या सुन्दैछौँ र समाधानको स्पष्ट कार्ययोजना लिएर आएका छौँ,” उहाँले भन्नुभयो।
जेन्जी आन्दोलनपछि नेपाली कांग्रेस ले संगठनलाई आमूल परिवर्तन गर्दै नयाँ ऊर्जा र दृष्टिकोणका साथ अघि बढेको उहाँको भनाइ छ। “बदलियो कांग्रेस, बदल्छ देश” भन्ने नारालाई आत्मसात गर्दै कांग्रेसले विकास, सुशासन, रोजगारी सिर्जना र पूर्वाधार विस्तारलाई प्राथमिकतामा राखेको उहाँले उल्लेख गर्नुभयो।
आचार्यले लुम्बिनी प्रदेशमा कांग्रेसले उल्लेख्य सफलता हासिल गर्ने दाबी गर्दै मुलुकलाई वर्तमान चुनौतीबाट निकास दिन सक्षम राजनीतिक शक्ति कांग्रेस नै भएको जिकिर गर्नुभयो। घरदैलो अभियानका क्रममा मतदाताबाट प्राप्त सुझावलाई आफ्नो आगामी कार्ययोजना र नीतिमा समेट्ने प्रतिबद्धता समेत उहाँले व्यक्त गर्नुभयो।