कपिलवस्तु । आगामी प्रतिनिधिसभा सदस्यको निर्वाचनमा अर्घाखाँचीबाट उमेदवार बनेकाहरू मत माग्न कपिलवस्तु आउने गरेका छन् ।
एमाले नेता लक्ष्मण बेलबासेका अनुसार, कपिलवस्तुको बाणगंगा, बुद्धभूमि र शिवराज नगरपालिकाको राजमार्ग क्षेत्रमा बसोबास गर्दै आएकामध्ये धेरैको नाम अर्घाखाँचीबाट मतदाता नामावलीमा रहेको छ ।
सोही कारण अर्घाखाँचीका उमेदवारहरू मत माग्नका लागि कपिलवस्तु आउने गरेको उनी बताउँछन् ।
अर्घाखाँचीबाट एमाले उमेदवार पिताम्बर भुसाल मतदातासँग भेटघाट र मत माग्न मंलबार बाणगंगा पुगेका छन् । यस्तै, अर्घाखाँचीमा कांग्रेस उमेदवार रहेका विष्णुप्रसाद खनाल पनि गत माघ २२ मा मतदातासँग भेटघाट गर्न सो क्षेत्रमा पुगेका थिए ।
अर्घाखाँचीमा कुल १५ जना उमेदवार चुनावी मैदानमा छन् । यहाँ कुल मतदाता १ लाख ७१ हजार ६५२ जना रहेका छन् ।
