कपिलवस्तु, चैत ६ गते । एक वर्षदेखि पाँच वर्ष उमेर समूहका बालबालिकाको बुद्धि विकास, शारीरिक वृद्धि तथा निरोगी जीवन प्रवद्र्धन गर्ने स्वर्ण प्राशन सम्बन्धी अभिमुखीकरण गरिएको छ ।
मुख्य प्रशिक्षक अर्जुनराज शर्माले स्वर्ण प्राशन आयुर्वेद पद्धतिमा बालबालिकाको रोग प्रतिरोधात्मक क्षमता अभिवृद्धि, स्मरणशक्ति सुदृढीकरण, बुद्धि विकास तथा समग्र वृद्धि विकासका लागि उपयोगी मानिने बताउनुभयो । उहाँले एक वर्षदेखि पाँच वर्ष उमेर समूहका बालबालिकालाई लक्षित गरी सञ्चालन गरिने यस्तो कार्यक्रमले बालस्वास्थ्य प्रवद्र्धनमा सहयोग पुग्ने विश्वास व्यक्त गर्नुभयो ।
स्वास्थ्य कार्यालयका प्रमुख गौरव ढकालले आयुर्वेद सेवालाई समुदाय स्तरसम्म प्रभावकारी रूपमा पु¥याउन यस्ता अभिमुखीकरण कार्यक्रम महत्वपूर्ण हुने बताउनुभयो । उहाँले बालबालिकाको स्वास्थ्य, पोषण र प्रतिरक्षा प्रणाली सुदृढ बनाउन आयुर्वेद पद्धतिका उपयोगी पक्षबारे अभिभावक र स्वास्थ्यकर्मीलाई सही जानकारी दिन आवश्यक रहेको उल्लेख गर्नुभयो ।
कपिलवस्तु आयुर्वेद स्वास्थ्य केन्द्रका प्रमुख नालीन नाथ तिवारीले स्वर्ण प्राशनलाई बालबालिकाको नियमित स्वास्थ्य स्याहारसँग जोडेर बुझ्नुपर्ने बताउनुभयो । उहाँले बालबालिकाको शारीरिक तथा मानसिक विकासमा सकारात्मक सहयोग पु¥याउने उद्देश्यले यो कार्यक्रम अघि बढाइएको जानकारी दिनुभयो । स्थानीय तह, स्वास्थ्य संस्था र आयुर्वेद सेवाबीचको सहकार्यबाट यस्ता कार्यक्रम प्रभावकारी बन्न सक्ने उहाँको भनाइ छ ।
कपिलवस्तु नगरपालिकाका स्वास्थ्य शाखा प्रमुख उमेश गुप्ताले बालस्वास्थ्य सुधारका लागि एलोपेथिक र आयुर्वेदिक दुवै प्रणालीबीच समन्वय आवश्यक रहेको बताउनुभयो । उहाँले समुदायमा पुगेर सही सूचना प्रवाह गर्न सके बालबालिकाको स्वास्थ्य संरक्षणमा सकारात्मक परिणाम प्राप्त गर्न सकिने धारणा राख्नुभयो ।
कपिलवस्तु आयुर्वेद स्वास्थ्य केन्द्र कपिलवस्तुको आयोजनामा सम्पन्न कार्यक्रम आयुर्वेद स्वास्थ्य केन्द्र व्यवस्थापन समितिका अध्यक्ष अफाक अहमद खानको अध्यक्षतामा भएको थियो । विभिन्न स्वास्थ्य चौकीका प्रमुखहरू तथा सरोकारवाला स्वास्थ्यकर्मीको सहभागिता रहेको थियो । कार्यक्रमको सञ्चालन वरिष्ठ कविराज अधिकृत हरिलाल उपाध्यायले गर्नुभएको थियो ।
