जिल्लाको महाराजगञ्ज नगरपालिका ६ सानो बुटहनिया स्थित तौलिहवा–बहादुरगंज हुलाकी सडक खण्डमा मोटरसाइकलको ठक्करबाट एक महिलाको मृत्यु भएको छ ।
जिल्ला प्रहरी कार्यालय कपिलवस्तुका अनुसार बहादुरगंजबाट तौलिहवातर्फ जाँदै गरेको लु ३६ प १९९४ नम्बरको होण्डा युनिकन १५० सिसी मोटरसाइकलले बाटो पार गर्दै गरेकी पैदलयात्री महाराजगञ्ज नगरपालिका ६ सानो बुटहनिया निवासी करिब ५० वर्षीया सबिता रैदासलाई ठक्कर दिएको थियो ।
दुर्घटनामा रैदासको दायाँ खुट्टा र पेटमा चोट लागेको थियो । घाइते अवस्थामै उहाँलाई उपचारका लागि शिवराज अस्पताल बहादुरगंज पठाइएको थियो ।
थप उपचारका लागि बुटवल लैजाँदै गर्दा स्वास्थ्य अवस्था गम्भीर बनेपछि जिल्ला अस्पताल तौलिहवामा ल्याइएकोमा चिकित्सकले मृत घोषणा गरेका प्रहरीले जनाएको छ ।
दुर्घटनामा मोटरसाइकलमा सवार चालकका भान्जा महाराजगञ्ज नगरपालिका ४ महुवा निवासी १० वर्षीय अजित चौधरी घाइते भएका छन् । उहाँको बाँया खुट्टा र दायाँ हातमा चोट लागेको छ । यस्तै मोटरसाइकलमा सवार चालककी बहिनी ६ वर्षीया अनुस्का चौधरीको दायाँ हात र निधारमा सामान्य चोट लागेको प्रहरीले जनाएको छ ।
दुवै घाइतेको अवस्था मध्यमदेखि सामान्य रहेको बताइएको छ । मोटरसाइकल चालक विजयनगर गाउँपालिका–३ नदैया निवासी २८ वर्षीय रविप्रसाद चौधरी हाल फरार रहेको र उनको खोजी कार्य जारी रहेको जिल्ला ट्राफिक प्रहरी कार्यालय कपिलवस्तुका प्रहरी निरिक्षक राजन ढकालले बताउनुभयो ।
