तौलिहवा(कपिलबस्तु), जेठ २२ गते । दलित सामाजिक विकास केन्द्र र युनाइटेड मिसन टु नेपालको संयुक्त साझेदारीमा सञ्चालित सीवाईसीसी परियोजनाअन्तर्गत मायादेवी गाउँपालिकामा विश्व वातावरण दिवस विविध कार्यक्रम गरी मनाइएको छ । दिवसको अवसरमा गाउँपालिकाभित्रका मदरसा तथा सामुदायिक विद्यालयमा वृक्षारोपण कार्यक्रम सञ्चालन गरिएको हो ।
कार्यक्रमअन्तर्गत मायादेवीको रियाजुल उलुम आधारभूत विद्यालय, स्वतन्त्र माध्यमिक विद्यालय, राष्ट्रिय माध्यमिक विद्यालय, नेपाल राष्ट्रिय माध्यमिक विद्यालय, आधारभूत विद्यालय इमिलिया, सरस्वती बुद्धज्योति आधारभूत विद्यालय, जनता आधारभूत विद्यालयमा वृक्षारोपण गरिएको थियो । कार्यक्रमका क्रममा मदरसा र विद्यालय परिसरमा विभिन्न जातका एक हजारभन्दा बढी बिरुवा रोपिएको सीवाईसीसी परियोजनाले जनाएको छ ।
मायादेवी–६ मुगाहरीस्थित नेपाल राष्ट्रिय माध्यमिक विद्यालयमा आयोजित वृक्षारोपण कार्यक्रममा शिक्षा विकास तथा समन्वय एकाइ कपिलवस्तुका प्रमुख माधव बन्जाडेले वातावरण संरक्षणका लागि वृक्षारोपण प्रभावकारी माध्यम भएको बताउनुभयो । उहाँले विद्यार्थीलाई प्रकृतिप्रति जिम्मेवार बन्न र रोपिएका बिरुवाको संरक्षणमा सक्रिय हुन आग्रह गर्नुभयो ।
कार्यक्रममा दलित सामाजिक विकास केन्द्रका कार्यकारी निर्देशक रामशरण तथा सीवाईसीसी परियोजनाका परियोजना संयोजक जितेन्द्र चौधरीले जलवायु परिवर्तनका चुनौती न्यूनीकरण गर्न वृक्षारोपण अभियानलाई निरन्तरता दिन आवश्यक रहेको बताउनुभयो । उहाँहरूले वातावरण संरक्षणमा विद्यालय र समुदायको सक्रिय सहभागिता महत्वपूर्ण हुने धारणा व्यक्त गर्नुभयो ।
वृक्षारोपण कार्यक्रममा विद्यालयका प्रधानाध्यापक, विद्यालय व्यवस्थापन समितिका पदाधिकारी, शिक्षक, विद्यार्थी तथा स्थानीय सरोकारवालाको सहभागिता रहेको थियो ।
विश्व वातावरण दिवसको अवसरमा एक हजारभन्दा बढी बिरुवा रोपण
