नेपालगन्ज, जेठ २९ गते । पूर्व खेलाडी समाज बाँकेको आयोजना तथा नेपालगन्ज उपमहानगरपालिकाको सहयोगमा शुक्रबार यहाँ आयोजित प्रथम मेयर कप अन्तर विद्यालय पौडी प्रतियोगितामा शिखा एकेडमी नेपालगन्ज च्याम्पियन बनेको छ ।
नेपालगन्ज रंगशाला परिसरभित्र रहेको पौडी पोखरीमा सम्पन्न भएको सो प्रतियोगितामा शिखा एकेडमीले १२३ अङ्कसाथ प्रथम, सोफिया रेसिडेन्सियल स्कूलले २२ अङ्कका साथ द्वितीय तथा स्प्रिङ्डेल एकेडेमीले १४ अङ्कका साथ तृतीय स्थान हासिल गर्न सफल हुनुभयो ।
सो प्रतियोगितामा नेपालगन्जका १४ वटा विद्यालयका ८२ जना छात्र–छात्राको सहभागिता रहेको थियो । विभिन्न उमेर समूहका छात्र तथा छात्राहरूबिच फ्रिस्टाइल, ब्याकस्ट्रोक, ब्रेस्टस्ट्रोक र बटरफ्लाई विधामा प्रतिस्पर्धा गरिएको थियो ।
प्रतियोगितामा उत्कृष्ट प्रदर्शन गर्दै शिखा एकेडेमीका सुशान्त बोहरा उत्कृष्ट छात्र घोषित हुनुभयो । उहाँले नगद पाँच हजार ५०० सहित सम्मान प्राप्त गर्नुभयो । त्यस्तै स्प्रिङ्डेल एकेडेमीकी नित्याश्री दहित उत्कृष्ट छात्रा घोषित हुनुभयो । उहाँले पनि पाँच हजार ५०० नगद पुरस्कार प्राप्त गर्नुभयो ।
नेपालगन्ज उपमहानगरपालिकाका नगर प्रमुख प्रशान्त बिष्ट, पूर्व खेलाडी समाज बाँकेका अध्यक्ष प्रकाशबहादुर श्रेष्ठ, सचिव नरेन्द्र थापा र सल्लाहकार अजितकुमार शर्मा लगायतले खेलाडीलाई पदक, ट्रफी, प्रमाणपत्र तथा पुरस्कार वितरण गर्नुभयो ।
कार्यक्रमलाई सम्बोधन गर्दै प्रमुख अतिथि बिष्टले पौडी खेल स्वास्थ्य, अनुशासन र जीवनरक्षासँग प्रत्यक्ष सम्बन्धित खेल भएको उल्लेख गर्दै विद्यालयस्तरबाट खेलकुद गतिविधिलाई प्राथमिकता दिनुपर्ने बताउनुभयो ।
