कपिलवस्तु । कपिलवस्तुको विजयनगर गाउँपालिका–७ गैडहवा क्षेत्रमा भारतबाट अवैध रूपमा ल्याइएको सिसौ जातको काठसहित एक जनालाई नियन्त्रणमा लिई आवश्यक कारबाहीका लागि वन कार्यालयमा बुझाइएको छ।
सशस्त्र प्रहरी बल, नेपाल र नेपाल प्रहरीको संयुक्त टोलीले शुक्रबार गरेको विशेष निगरानीका क्रममा भारतबाट अवैध रूपमा ल्याई लुकाइराखिएको अन्दाजी ११० क्युबिक फिट (९ गोलिया) सिसौ जातको काठ बरामद गरेको हो। बरामद गरिएको काठको अनुमानित मूल्य रु. ३ लाख ७९ हजार रहेको जनाइएको छ।
उक्त काठसँग संलग्न रहेको आरोपमा कृष्णनगर नगरपालिका–२ निवासी ५२ वर्षीय मक्सद शाहालाई नियन्त्रणमा लिइएको छ। बरामद काठ र पक्राउ परेका शाहालाई आवश्यक अनुसन्धान तथा कानुनी कारबाहीका लागि सब–डिभिजन वन कार्यालय ठाकुरापुरमा बुझाइएको सशस्त्र प्रहरी स्रोतले जनाएको छ।
घटनाबारे थप अनुसन्धान भइरहेको प्रहरीले जनाएको छ।
