कपिलवस्तु, साउन १२ गते । कपिलवस्तुमा घरको माटोको भित्ता भत्काउने क्रममा च्यापिँदा एक श्रमिकको मृत्यु भएको छ । मृत्यु हुनेमा विजयनगर गाउँपालिका–४ ज्योतिनगर निवासी २४ वर्षीय सुरेश रोक्का रहेको जिल्ला प्रहरी कार्यालय कपिलवस्तुका प्रहरी नायव उपरीक्षक रिपेन्द्र कुमार सिंहले जानकारी दिनुभयो ।
प्रहरीका अनुसार मंगलबार विहान ७ः३० बज सोही गाउँपालिका–४ त्रिपालनगरस्थित सन्तोष गुरुङको घरको माटोको भित्ता भत्काउने क्रममा उक्त दुर्घटना भएको हो । भित्ता भत्काउने क्रममा बुवा कर्णबहादुर रोक्का घरको बाहिरतर्फ र छोरा सुरेश रोक्का भित्रतर्फ बसेर काम गरिरहेका बेला एक्कासि भित्ता भत्किएर सुरेश च्यापिएका थिए ।
गम्भीर घाइते भएका सुरेशलाई उपचारका लागि अस्पताल लैजाँदै गर्दा बाटोमै मृत्यु भएको इलाका प्रहरी कार्यालय गणेशपुरका प्रहरी निरीक्षक महेश कुमार आचार्यले बताउनुभयो ।
प्रहरीले मृतकको शव पोस्टमार्टमका लागि शिवराज अस्पताल, बहादुरगञ्ज पठाएको जनाएको छ। घटनाबारे थप अनुसन्धान भइरहेको इलाका प्रहरी कार्यालय गणेशपुरले जनाएको छ ।
