कपिलवस्तु, साउन २२। भारतबाट भन्सार छली अवैध रूपमा नेपाल भित्र्याउँदै गरिएका ८० वटा खसी सशस्त्र प्रहरीले कपिलवस्तुबाट बरामद गरेको छ।
सशस्त्र प्रहरी बल, नेपाल बीओपी जवाभैराठ, कपिलवस्तुबाट सशस्त्र प्रहरी निरीक्षक कृष्णबहादुर बोहराको कमाण्डमा खटिएको टोलीले शुक्रबार विजयनगर गाउँपालिका–१, नयाँगाउँस्थित दशगजा क्षेत्रबाट ती खसी बरामद गरेको हो।
सशस्त्र प्रहरीका अनुसार बरामद गरिएका ८० वटा खसीको अनुमानित मूल्य ८ लाख ३२ हजार ५०० रुपैयाँ रहेको छ।
प्रहरी टोली पुग्नासाथ खसी ल्याउने व्यक्तिहरू खसी छाडेर भारततर्फ फरार भएका थिए। बरामद खसी आवश्यक कानुनी प्रक्रिया पूरा गरी सम्बन्धित निकायमा बुझाउने तयारी भइरहेको सशस्त्र प्रहरीले जनाएको छ।
सीमा क्षेत्रमा हुने चोरीपैठारी तथा भन्सार छली नियन्त्रणका लागि सशस्त्र प्रहरीले निगरानी र गस्तीलाई थप प्रभावकारी बनाएको सशस्त्र प्रहरी उपरीक्षक गोपाल अधिकारीले बताए।
