अल–कलममा परीक्षाफल प्रकाशन

कपिलबस्तु। अल–कलम पब्लिक स्कूल बहादुरगञ्जमा प्रथम त्रैमासिक परीक्षाफल प्रकाशन, उत्तरपुस्तिका अवलोकन, अभिभावक छलफल तथा तालिम कार्यक्रम सम्पन्न भएको छ।
कार्यक्रममा विद्यार्थीको प्रथम त्रैमासिक परीक्षाको नतिजा सार्वजनिक गर्नुका साथै अभिभावकलाई उत्तरपुस्तिका अवलोकन गराइएको थियो। विद्यार्थीको शैक्षिक अवस्था र सुधार गर्नुपर्ने पक्षबारे अभिभावकलाई जानकारी गराइएको विद्यालयले जनाएको छ।
सो अवसरमा बालबालिकाको पढाइ तथा चौतर्फी विकासका विषयमा शिक्षक, विद्यालय प्रशासन र अभिभावकबीच छलफल भएको थियो। अभिभावकबाट विद्यालयको शैक्षिक सुधारका लागि सुझाव तथा प्रतिक्रिया पनि संकलन गरिएको थियो।
अभिभावकका लागि आयोजित तालिममा घरमा बालबालिकालाई पढाइमा कसरी सहयोग गर्ने, उपयुक्त वातावरण कसरी तयार गर्ने तथा बालबालिकाको सिकाइ र व्यवहारमा ध्यान दिनुपर्ने विषयमा प्रशिक्षक नारायण भण्डारी र बी.के. विश्वकर्माले सहजीकरण गर्नुभएको थियो।
विद्यालयका संस्थापक तारिक अजिज खानले स्वागत मन्तव्य व्यक्त गर्नुभएको कार्यक्रममा शिक्षक–शिक्षिका, अभिभावक तथा विद्यार्थीको सहभागिता थियो। कार्यक्रमको सञ्चालन प्रभुदयाल चौधरीले गर्नुभएको थियो।