तौलिहवा (कपिलवस्तु), भदौ ५ गते। कपिलवस्तु नगरपालिकाका पूर्वनगरप्रमुख स्वर्गीय किरण सिंहको मृत्यु प्रकरणमा सूक्ष्म अनुसन्धान गरी सत्यतथ्य बाहिर ल्याउन सर्वपक्षीय भेलाले माग गरेको छ।
भदौ ५ गते भएको सर्वपक्षीय भेलाले नारायणबहादुर सिंहको अध्यक्षतामा बैठक गरी पूर्वनगरप्रमुख सिंहको मृत्यु सम्बन्धी घटनाको केन्द्रीय अनुसन्धान ब्युरो (सीआईबी) मार्फत सूक्ष्म अनुसन्धान गरी वास्तविकता सार्वजनिक गर्नुपर्ने निर्णय गरेको हो।
बैठकमा नेपाली कांग्रेस, राष्ट्रिय स्वतन्त्र पार्टी, नेकपा (एमाले), नेपाली कम्युनिस्ट पार्टी, राष्ट्रिय प्रजातन्त्र पार्टी, राष्ट्रिय जनमोर्चा, श्रमसंस्कृति पार्टीलगायत राजनीतिक दल तथा विभिन्न पक्षका प्रतिनिधिहरूको सहभागिता रहेको थियो।
बैठकको निर्णयअनुसार प्रधानमन्त्रीसमक्ष माग राख्दै जिल्ला प्रशासन कार्यालय कपिलवस्तुमार्फत ज्ञापनपत्र बुझाइएको छ। सर्वदलीय तथा सर्वपक्षीय प्रतिनिधिहरूले प्रमुख जिल्ला अधिकारीमार्फत प्रधानमन्त्रीलाई सम्बोधन गरिएको ज्ञापनपत्र बुझाएका हुन्।
ज्ञापनपत्र बुझाउने क्रममा पूर्वमन्त्री एवं भारतका लागि नेपालका पूर्वराजदूत दीपकुमार उपाध्याय, लुम्बिनी प्रदेशसभा सदस्य सुधाकर पाण्डेलगायत सर्वदलीय तथा सर्वपक्षीय प्रतिनिधिहरूको उपस्थिति रहेको थियो।
ज्ञापनपत्रमार्फत स्वर्गीय सिंहको मृत्यु प्रकरणमा कुनै पनि आशंका बाँकी नरहने गरी निष्पक्ष, स्वतन्त्र र सूक्ष्म अनुसन्धान गर्न तथा घटनाको सत्यतथ्य यथाशीघ्र सार्वजनिक गर्न माग गरिएको छ।
