कपिलवस्तु । नेपाल प्रेस युनियन कपिलवस्तु शाखाको १३औँ साधारण सभा तथा आठौँ शाखा अधिवेशन यही भदौ २७ गते शनिबार हुने भएको छ ।
शाखाको तौलिहवामा बसेको बैठकले अधिवेशनको मिति तय गर्नुका साथै अधिवेशन सफल बनाउन आवश्यक विभिन्न तयारीसम्बन्धी निर्णय गरेको हो ।
बैठकले पत्रकारितामा योगदान पुर्याउने पत्रकारलाई प्रदान गरिँदै आएको प्रमोदराज स्मृति पत्रकारिता पुरस्कार अञ्जु लामिछाने, सविता तेली र कृष्णप्रसाद पौडेललाई प्रदान गर्ने निर्णय गरेको छ । त्यस्तै स्वर्गीय गिरिजाप्रसाद कोइराला स्मृति पत्रकारिता पुरस्कार प्रेस युनियन कपिलवस्तुका पूर्वअध्यक्ष गोपाल भण्डारी र राजु खराललाई प्रदान गर्ने निर्णय गरिएको छ ।
अधिवेशनका लागि निर्वाचन समिति समेत गठन गरिएको छ । अधिवक्ता शम्भु सैनीको संयोजकत्वमा गठित समितिको सदस्यमा प्रवीणकुमार श्रीवास्तव र प्रेस युनियनका पूर्वअध्यक्ष मनोज पौडेल रहनुभएको छ ।
शाखा सभापति खगप्रसाद चापागाईँले अधिवेशनलाई सफल बनाउन आवश्यक पूर्वतयारीका लागि बैठकबाट विभिन्न निर्णय गरिएको बताउनुभयो ।
बैठक शाखा सभापति खगप्रसाद चापागाईँको अध्यक्षता तथा सचिव अंकुश श्रीवास्तवको सञ्चालनमा सम्पन्न भएको थियो । बैठकमा नेपाल प्रेस युनियनका केन्द्रीय सदस्य नारद कोहार, शनिउल्ला धोबी, महासङ्घका पूर्वअध्यक्ष तथा शाखाका पूर्वउपाध्यक्ष किरण मान बज्राचार्य, कार्यसमिति सदस्यलगायतको सहभागिता रहेको थियो ।
