दाङ, असोज २७ गते । दाङमा १९० जना प्रहरी कर्मचारीको स्वास्थ्य परीक्षण गरिएको छ ।
समुदाय–प्रहरी साझेदारी अवधारणाअन्तर्गत जिल्ला प्रहरी कार्यालय दाङको समन्वय तथा त्रिभुवननगर जेसीज घोराहीको आयोजनामा सोमबार स्वास्थ्य शिविर सञ्चालन गरिएको हो ।
जिल्ला प्रहरी कार्यालय दाङको प्राङ्गणमा आयोजित शिविरमा सञ्जीवनी डेन्टल क्लिनिक र नेशनल प्याथ ल्याब घोराहीले प्राविधिक सहयोग गरेका थिए ।
शिविरमा जिल्ला प्रहरी कार्यालय तथा मातहतका कार्यालयमा कार्यरत प्रहरी कर्मचारीको सुगर, रक्तचाप, दाँत तथा मिर्गौलासम्बन्धी स्वास्थ्य परीक्षण गरिएको थियो ।
त्रिभुवननगर जेसीजका अध्यक्ष मीनराज भाटको अध्यक्षता तथा जिल्ला प्रहरी कार्यालय दाङका प्रमुख प्रहरी उपरीक्षक दीपक श्रेष्ठको प्रमुख आतिथ्यतामा सम्पन्न कार्यक्रममा प्रहरी नायब उपरीक्षक डा. हेमबहादुर केसी, नेपाल पत्रकार महासङ्घका केन्द्रीय सचिव सविन प्रियासन, स्वास्थ्यकर्मी, जेसीजका पदाधिकारी, सञ्चारकर्मी तथा प्रहरी कर्मचारीको सहभागिता रहेको थियो ।
