कपिलवस्तु, कात्तिक १५ गते । कपिलवस्तुको वाणगंगा नगरपालिका–३ राजापानीबाट प्रहरीले २८ ग्राम ८२० मिलिग्राम ब्राउन सुगरजस्तो देखिने पदार्थसहित दुई जनालाई पक्राउ गरेको छ ।
इलाका प्रहरी कार्यालय पिपरा र लागूऔषध नियन्त्रण ब्युरो भैरहवाबाट खटिएको संयुक्त प्रहरी टोलीले शनिबार दिउँसो करिब २ बजे राजापानीस्थित राधाकृष्ण नास्ता पसलबाट उनीहरूलाई नियन्त्रणमा लिएको हो ।
पक्राउ पर्नेमा कपिलवस्तु नगरपालिका–११ का २६ वर्षीय सलाउद्दिन मुसलवान र वाणगंगा नगरपालिका–६ का २९ वर्षीय उमेश थारू रहेका छन् ।
जिल्ला प्रहरी कार्यालय कपिलवस्तुका प्रहरी नायब उपरीक्षक (डीएसपी) रिपेन्द्रकुमार सिंहका अनुसार उक्त पसलमा लागूऔषधको कारोबार भइरहेको गोप्य सूचनाका आधारमा इलाका प्रहरी कार्यालय पिपराका प्रहरी निरीक्षक कालिका कार्कीको कमाण्डमा सात जनाको टोली र लागूऔषध नियन्त्रण ब्युरो भैरहवाबाट प्रहरी नायब निरीक्षक सागर भट्टराईको टोली संयुक्त रूपमा परिचालन भएको थियो ।
प्रहरी टोलीलाई देखेपछि पक्राउ परेका दुवै जना भाग्न खोज्दा प्रहरीले दुई राउन्ड हवाई फायर गरेको थियो । त्यसपछि उनीहरूलाई नियन्त्रणमा लिई खानतलासी गर्दा साथबाट प्लास्टिकसहित २४ ग्राम ८१० मिलिग्राम र मोटरसाइकलको सिटमुनि लुकाइराखेको प्लास्टिकसहित पाँच ग्राम ८४० मिलिग्राम खैरो रङको गिलो पदार्थ बरामद भएको प्रहरीले जनाएको छ ।
बरामद पदार्थको प्लास्टिक हटाई शुद्ध तौल गर्दा २८ ग्राम ८२० मिलिग्राम रहेको प्रहरीले जनाएको छ । प्रहरीले उनीहरूले प्रयोग गरेको भारतीय नम्बर प्लेटको मोटरसाइकलसमेत नियन्त्रणमा लिएको छ ।
पक्राउ परेका दुवै जनालाई बरामद लागूऔषध र मोटरसाइकलसहित आवश्यक अनुसन्धानका लागि इलाका प्रहरी कार्यालय पिपरामा राखिएको डीएसपी सिंहले जानकारी दिनुभयो ।
उक्त स्थान इलाका प्रहरी कार्यालय पिपराबाट करिब पाँचदेखि छ किलोमिटर दक्षिणमा पर्दछ । घटनाबारे थप अनुसन्धान भइरहेको प्रहरीले जनाएको छ ।
