सिद्धार्थ शाक्य । ताैलिहवा
कपिलवस्तु, तौलिहवा। कपिलवस्तुको तौलिहवास्थित बुद्ध पद्म खेल मैदानमा रहेको ऐतिहासिक महेन्द्र मञ्च जीर्ण अवस्थामा पुगेको छ।
जिल्लाको राजनीतिक, सामाजिक, सांस्कृतिक तथा खेलकुद गतिविधिको साक्षी बनेको यस मञ्चको संरक्षण र मर्मतसम्भारमा सम्बन्धित निकायको ध्यान पुग्न सकेको छैन।
२०४८ सालदेखि यसै मञ्चबाट देशका ठूला राजनीतिक दलका नेतादेखि विभिन्न समयमा प्रधानमन्त्री बनेका व्यक्तित्वहरूले सम्बोधन गर्दै आएका छन्। कतिपय अहिले जीवित छन् भने कतिपय दिवंगत भइसकेका छन्।
अनगिन्ती मेला, महोत्सव, राष्ट्रिय तथा अन्तर्राष्ट्रिय खेलकुद प्रतियोगिता र धार्मिक कार्यक्रमसमेत आयोजना हुँदै आएको यस मञ्चको आफ्नै ऐतिहासिक र सांस्कृतिक महत्त्व छ।
तर, हजारौँ मानिसको जमघट र ऐतिहासिक कार्यक्रमको साक्षी बनेको महेन्द्र मञ्च आज आफैँ जीर्ण अवस्थामा पुगेको छ। मञ्चको भौतिक अवस्था दयनीय बन्दै जाँदा पनि यसको मर्मतसम्भार तथा रङ्गरोगनका लागि आवश्यक पहल हुन सकेको छैन।
यस मैदानमा वर्षेनी विभिन्न मेला, महोत्सव तथा कार्यक्रम आयोजना हुने गरेका छन्। ती कार्यक्रमबाट प्राप्त हुने आम्दानीको सानो हिस्सा मात्रै भए पनि मञ्चको मर्मतसम्भार, रङ्गरोगन र संरक्षणमा खर्च गर्न सके यसको मुहार फेरिन सक्ने स्थानीयको अपेक्षा छ।
ऐतिहासिक महत्त्व बोकेको सार्वजनिक सम्पत्तिको संरक्षण गर्नु सबैको दायित्व हो। कार्यक्रमबाट आम्दानी गर्ने आयोजक, स्थानीय सरकार तथा सम्बन्धित सरोकारवाला निकायले यस विषयमा गम्भीर ध्यान दिन आवश्यक देखिन्छ।
विकास र परिवर्तनका कुरा गर्ने जनप्रतिनिधि तथा सरोकारवालाको ध्यान अब ऐतिहासिक महेन्द्र मञ्चको संरक्षणतर्फ पनि जाओस्। यो मञ्चको मुहार फेर्न कसैको के नै घट्ने थियो र?
















































