कपिलवस्तु । वडा प्रहरी कार्यालय तौलिहवाले कपिलवस्तु नगरपालिका–तौलिहवा बजार क्षेत्रबाट बरामद गरेको २५० लिटर घरेलु मदिरा नष्ट गरेको छ।
प्रहरीले मदिरा उत्पादन गर्न प्रयोग गरिने १५० लिटर कच्चा पदार्थ र तयारी अवस्थामा रहेको १०० लिटर घरेलु मदिरा बरामद गरी नष्ट गरेको हो।
वडा प्रहरी कार्यालय तौलिहवाका प्रमुख प्रहरी नायब निरीक्षक प्रदीप पोखरेलले अवैध घरेलु मदिराको उत्पादन तथा बिक्री वितरण नियन्त्रण गर्ने उद्देश्यले बजार क्षेत्रमा निगरानी बढाइएको बताउनुभयो। उहाँले यस्ता गतिविधि नियन्त्रण गर्न प्रहरीको निगरानी र कारबाहीलाई निरन्तरता दिइने जानकारी दिनुभयो।
पोखरेल, कपिलवस्तु नगरपालिका वडा सदस्य विष्णुप्रसाद बारी, पत्रकारलगायतको रोहबरमा बरामद गरिएको मदिरा नष्ट गरिएको हो।
















































