चितवन । जिल्ला प्रशासन कार्यालय चितवनले राप्ती नगरपालिकास्थित राजमार्ग क्षेत्रमा कर्फ्यु आदेश जारी गरेको छ।
सुजिता भण्डारीको मृत्युको विषयलाई लिएर केही व्यक्तिहरूले पूर्व–पश्चिम राजमार्ग अवरुद्ध गर्ने, बिच सडकमा भीड जम्मा गरी हुल हुज्जत, ढुंगामुडा, सरकारी गाडी तोडफोड तथा निजी सम्पत्ति र संरचना तोडफोड गर्ने, आगजनी तथा हुलदङ्गा गर्न सक्ने देखिएको भन्दै कर्फ्यु आदेश जारी गरिएको प्रशासनले जनाएको छ।
प्रमुख जिल्ला अधिकारी प्रेमलाल लामिछानेले मंगलबार साँझ साढे ७ बजे देखि बुधवार साँझ साढे ७ बजेसम्म कर्फ्यु आदेश जारी गरिएको बताएका छन्।आदेश पूर्व–पश्चिम राजमार्गको लोथर पुलदेखि राप्ती–४ को डडुवासम्मको राजमार्ग तथा दायाँ, बायाँको ५०० मिटर क्षेत्रका लागि रहेको छ।
कर्फ्युको समयमा लामो दूरीका सवारी साधनबाहेक कुनै पनि व्यक्तिले आवतजावत गर्न, भेला हुन पाइने छैन भने स्थानीय प्रशासनको स्वीकृति बेगर घर बाहिर निस्कनसमेत रोक हुनेछ ।
स्थानीय प्रशासन ऐन २०२८ को दफा ६८ क९१० बमोजिम गरिएको आदेश अवज्ञा गर्ने व्यक्तिलाई तत्काल गिरफ्तार गरी एक महिना कैद वा जरिवाना वा दुवै सजाय हुने छ ।
