काठमाडौं । नेपाली क्रिकेटको राष्ट्रिय टोलीका पूर्वकप्तान तथा अन्तराष्ट्रिय क्रिकेटबाट सन्यासीको घोषणा गरेका पारस खड्काले अब आफू लाइन मिले राजनीतिमा आउन सक्ने बताएका छन् ।
बुधबार पत्रकार सम्मेलन गर्दै पारसले आफ्नो पहिलो प्राथमिकता क्रिकेट संघमा जाने रहेको बताए । त्यसमा सफल हुन सके राजनीतिमा आउन सक्ने उनले बताए ।
आफूलाई अवसर आए र लाइन मिले राजनीति गर्ने सोचसमेत भएको बताएका हुन्। तर, आफ्नो प्राथमिकता भने क्रिकेट नै भएको उनले बताए।
उनले भने, ‘आजबाट मेरो करियर सुरु भएको छ । यो चुनौतिपूर्ण छ, राम्रो अवसर आयो भने राजनीतिमा पनि हुनसक्छु ।’
उनले अघि भने, ‘राइट अपरच्युनिटी आयो भने राजनीतिमा पनि हुनसक्छु । आगामी दिनमा अवसरहरू आउँछ भने त्यो पनि किन नहुनु ? त्यसअघि नै क्रिकेटलाई कुनै ठाउँमा पुर्याउन सक्नेतर्फ लाग्नुपर्छ, मेरो पहिलो प्राथमिकता क्रिकेट राम्रो होस् भन्ने नै हो ।
आफूले क्रिकेटमा भोगेका घटनाबारे किताब लेख्ने सोच पनि भएको उनको भनाइ छ। ‘मसँग धेरै घटना र अनुभव छन्, जुन म भन्न सक्दिन। कुनै दिन किताब लेख्ने रुची पनि छ।’ तर, आफूले अहिले त्यसबारे नसोचेको पनि बताए।
मलेसियामा भएको विश्व क्रिकेट लिग डिभिजन–३ जितेपछि टिममा पर्न नसकेका साथीहरुले कोठामा आफूलाई सिरक ओढाएर कुटेको प्रसंग पनि उनले सुनाए। ‘कसैले ब्याटिङ गर्न पाएनन् होला, कसैले बलिङको अवसर पाएनन् होला। ती साथीले सिरकले छोपेर पिटे। यस्ता धेरै घटना छन्। कुनै दिन किताब लेख्ने रहर पनि छ,’ उनले भने।
उनले आगामी दिनमा क्रिकेटलाई कसरी राम्रो गर्न सकिन्छ भनेर क्यानसहितका अधिकारीलाई आइडिया दिनसक्ने भन्दै आगामी दिनमा मौका मिलेमा क्यानमा कुनै भूमिका निर्वाह गर्न सक्ने पनि बताए ।