काठमाडौँ । नेकपा माओवादी केन्द्रको भातृ संगठन अखिल क्रान्तिकारीको अध्यक्षमा पञ्चा सिंह चयन भएकी छन् । सिंह अखिल क्रान्तिकारीको इतिहासमै पहिलो महिला अध्यक्ष बनेकी हुन् ।
आइतबार (आज) बिहान पार्टी अध्यक्ष पुष्पकमल दाहाल प्रचण्डले पञ्चा सिंहलाई नै अखिल क्रान्तिकारीको अध्यक्षमा चयन गरिएको निर्णय सुनाएका हुन् ।
अखिल क्रान्तिकारीले संगठनको अध्यक्ष चयनको जिम्मा पार्टी अध्यक्ष प्रचण्डलाई दिएको थियो । मुख्य रुपमा पञ्चा सिंह र सुरेन्द्र बस्नेत अध्यक्षका दाबेदार थिए । यीमध्ये अध्यक्ष प्रचण्डले सिंहलाई चयन गरेको जानकारी दिएका हुन् ।
अखिलका नेताहरु यस विषयमा छलफल गर्न आइतबार प्रचण्ड निवास खुमलटार पुगेका थिए, सोही क्रममा प्रचण्डले सिंहलाई अध्यक्ष चयन गरेको बताएका हुन् । यद्यपि यसको औपचारिक भइसकेको छ । अहिले अखिलको २२ औं राष्ट्रिय सम्मेलन जारी रहेको छ, यसैको बन्दसत्रबाट सिंहलाई अध्यक्ष चयन गरिएको घोषणा गरिने जनाइएको छ ।
