जनकपुर, १३ कात्तिक । सत्तारुढ नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले ‘अर्ली इलेक्सन’ सम्भव नभएको बताएका छन् ।
आज (शनिबार) जनकपुर विमानस्थलमा सञ्चारकर्मीका जिज्ञासाको जवाफ दिने क्रममा उनले यस्तो बताएका हुन् । अध्यक्ष दाहालले अर्ली इलेक्सन हुने कुनै पनि सम्भावना नरहेको बताए । ‘हाम्रो संवैधानिक व्यवस्था र सर्वोच्च अदालतको पछिल्लो फैसलाले पनि मुलुक अर्ली इलेक्सनमा जान मिल्ने अवस्थामा छैन’, उनले भने, ‘अर्ली इलेक्सन हुँदैन । बडो क्लियर हुनुहोला । अर्ली इलेक्सन हाम्रो संवैधानिक व्यवस्थाले पनि परिकल्पना गरेको छैन।’
प्रचण्डले सर्वोच्च अदालतले गरेको फैसलाले पनि अर्ली इलेक्सन सम्भव नहुने बताउँदै यसमा कोही पनि अलमलमा नपर्न आग्रह गरेका छन् । अध्यक्ष प्रचण्डले राष्ट्रियसभाको निर्वाचनमा सत्तारुढ गठबन्धनले मिलेर चुनाव लड्ने सैद्धान्तिक सहमति भइसकेको जानकारी पनि दिएका छन् । उनले अध्यादेश ल्याएर भए पनि नागरिकता विधेयक अगाढि बढाउन आफूहरु तयार रहेको बचन पनि प्रदेश–२ मा पुगेर दिएका छन् ।
