काठमाडौं । चर्चित संगितकार विनोद बाजुरेलीले नेकपा एमालेको संगठित सदस्यता परित्याग गरेको घोषणा गरेका छन् । उनले सो पार्टीबाट राजिनामा दिएर तटस्थ रहेको पनि बताएका छन् ।
बुधबार बिहान समाजिक संजाल फेसबुक मार्फत् बाजुरेलीले यस्तो घोषणा गरेका हुन् । अब उप्रान्त गरेका सम्पूर्ण प्रयासहरु मान्छेलाई अल्मल्याउनको निमित्त गरिने भएकाले अहिलेकै समयदेखि म नेकपा एमालेको संगठित सदस्यता परित्याग गर्दै नेकपा एमालेको जनसंगठन राष्ट्रिय जन– साँस्कृतिक महासंघ–सुदुरपश्चिम प्रदेश, तदर्थ समिति संयोजकबाट राजीनामा दिई हाललाई तटस्थ रहेको घोषणा गर्दछु, बाजुरेलीले सामाजिक संजालमा लेखेका छन् ।
विशेष गरी नेकपा एमालेको जिल्ला नेतृत्वमा आएको विचलनको परिणाम नेपालको संविधान र पार्टी विधान अनि अन्तरपार्टी निर्देशनले सुनिश्चित गरेको समानुपातिक प्रतिनिधित्वको बेवास्ता मात्र होईन, अवैधानिक र मनमौजी तरिकाले प्रतिनिधि छनौट गरी प्रक्रिया अगाडि बढाएको कुरालाई म घोर निन्दा भ्रत्र्सना गर्दछु ।
यो निन्दनीय कार्यलाई पुनर्विचार गरी पूर्ण वैधानिक तवरबाट पुनः प्रतिनिधि छनोटको कार्य गर्नुपर्ने म लगायतका साथीहरुको आग्रहलाई जिल्ला, केन्द्र र विशेषगरी दलित सम्बद्ध एमालेका जनसंगठनका व्यक्तिहरुले समेत चासो नदिई आवाजलाई दबाउने कार्यले झन् मर्माहत तुल्याएको छ । यो कार्यले मेरो २४ वर्षदेखि को अटुट आस्था र पार्टीप्रतिको मोह नै भंग भएको अवस्थामा पुर्याएको छ ।
जुन जातीय उत्पीडनबाट मुक्त हुनको लागि नेकपा एमालेमा संगठित र सकृय भइयो त्यही एमालेले दलितको कोटामा गरेको निकृष्ट, घृणित, निन्दनीय तथा अक्षम्य कार्यलाई एउटा सचेत, जागरुक नागरिकको हैसियतले स्वीकारेर बस्नु भनेको महाअपराध गर्नु नै हो भन्ने निश्कर्षमा पुगियो । यो जघन्य अपराधलाई सामान्य आग्रहमा नै सच्याइने छ भन्ने मेरो अनुमान त्यतिबेला तुषारापात भयो जतिबेला जिल्लादेखि माथिका सबै नेतृत्वहरु र दलित संगठनका ब्यक्तिहरुले गम्भीरता पूर्वक लिन नै चाहेनन् ।
अन्य राजनीतक दलसित आबद्ध हुने वा नहुने भन्ने कुरा एमालेको ज्यादतीका विपक्षमा रहेका साथीहरुको सल्लाह र परामर्शमा गरिने जानकारी गराउँछु ।
