माओवादी केन्द्रका अध्यक्ष प्रचण्डले अर्काको नाममा लुकाएर राखेको लाजिम्पाटस्थित आफ्नो बङ्गला बिक्री गर्नुभएको छ । विख्यात व्यवसायी अजय सुमार्गीकी अति नकटतम् नातेदारको नाममा रहेको एकचालिस आना क्षेत्रफलमा बनेको उक्त बङ्लालाई केही वर्षअघि प्रचण्डले स्थायी बसोबास बनाउने निधो गर्नुभएको थियो । तर, त्यस बङ्लामा बस्न थालेपछि सबभन्दा ठूलो पार्टीको हैसियत गुमाएर (२०७० मा) तेस्रो पार्टी बनेको, छोराको सन्देहास्पद मृत्यु भएको र, पत्नी सीताको स्वास्थ्यस्थिति समेत नाजुक हुँदै गएकोले आफ्ना विश्वासप्राप्त ठेकेदार शारदाप्रसाद अधिकारीको नाममा खरिद गरिएको धापाखेलनजिक खुमलटारको घरमा प्रचण्ड सर्नुभएको बताइन्छ । लाजिम्पाट छोडेपछि उहाँ अहिलेसम्म सोही घरमा रहँदै आउनुभएको छ ।
लाजिम्पाटस्थित घर बिक्रीका निम्ति प्रचण्डकै छोरीहरूले ग्राहक खोज्नुभएको थियो । भरतपुरको मेयर भएपछि सम्पर्कमा आएका कैलाश खड्का नामक व्यक्तिसँग कुरा मिलाएर रेणु दाहालले निजलाई निकै सस्तोमा घर बिक्री गराइदिएको जानकारीमा आएको छ । प्राप्त समाचारअनुसार प्रतिआना एक करोडभन्दा बढी मूल्य पर्ने ४१ आनाको उक्त जमिन जम्मा सत्ताइस (२७) करोड रुपैयाँमा बिक्री गरिएको छ । यसरी बुबाको घर बिक्री गराइदिएबापत छोरी रेणुले के-कति नगद कमिशनबापत हात पार्नुभयो या भएन सो यकीन हुन सकेको छैन । खड्कानिकटको स्रोतअनुसार उक्त घर खरिद गरेबापत कसैलाई पनि कमिसन दिनु परेको थिएन ।
माओवादी पार्टीका अध्यक्ष प्रचण्डले सम्पत्ति विवरणमा आफूसँग तीन तेला सुन र एक कठ्ठा जमिन मात्र रहेको विवरण राज्यलाई उपलब्ध गराउनुभएको छ । राज्यलाई यसरी गलत विवरण दिइएको भए पनि प्रचण्डको विलाशी र वैभवपूर्ण जीवनशैलीले उहाँलाई नेपालका अति धनाढ्यमध्येका एक व्यक्तिको पहिचान दिएको छ ।
प्रचण्डले आफ्नो सम्पत्ति अन्य विभिन्न व्यक्तिका नाममा राख्नुभएको बुझिन्छ । त्यसरी लुकाएका सम्पत्तिमध्ये एनसेलमा प्रचण्डले स्वनाम साथी (हाल स्वर्गीय) को नाममा शेयर राख्नुभएको थियो । अर्बौं रुपैयाँबराबरको शेयर स्वनाम जीवित रहँदै उहाँको नामबाट बेलायतमा बसोबास गर्ने प्रचण्डको भाइका नाममा सारिएको थियो । वर्षौंसम्म प्रचण्डको सम्पत्तिको ‘सूरक्षा गार्ड’ भएर पनि नामसारी गर्ने बेलामा ‘विचार नगरिदिको’ भन्दै स्वनामले मर्नुअघिसम्म प्रचण्डप्रति गुनासो गरेका गरेका थिए । आफ्नो पुत्र प्रकाशको निधन र पत्नीको स्वास्थ्यावस्था खराब भएयता प्रचण्डले विभिन्न नाम र अवस्थामा रहेको आफ्नो सम्पत्तिको व्यवस्थापन गर्ने कार्यलाई गति दिनुभएको देखिन्छ । यसै क्रममा लाजिम्पाटस्थित बङ्गला पनि बिक्री गरेको बुझिएको छ ।
-घटना र विचारबाट
