बंगलादेशमा जारी साफ यु–१९ महिला फुटबल च्याम्पियनसिपमा आज नेपालले भारतविरुद्ध खेल्दैछ । नेपाल र भारतबीचको खेल ढाकास्थित वीर श्रेष्ठ शहीद सिपाही मुस्तफा कमल स्टेडियममा दिउँसो ३ बजेदेखि सुरु हुनेछ ।
भारतसँगको खेल नेपालका लागि महत्वपूर्ण छ । यदि यो खेल बराबरी खेले वा जिते नेपाल फाइनलमा पुग्नेछ । यदि भारतसँग हारे फाइनल पुग्ने नेपालको लक्ष्य लगभग समाप्त हुनेछ ।
अघिल्लो खेलमा भुटानलाई ४-० ले हराएको नेपाल लयमा देखिएको छ । नेपालले तीन म्याच खेल्दा कुनै पनि खेलमा गोल खाएको छैन । पहिलो खेलमा बंगलादेशविरुद्ध गोलरहित बराबरी खेलेको नेपालले दोस्रो म्याचमा श्रीलंकालाई ६-० गोल अन्तरले हराएको थियो । भारतले तीन म्याच खेल्दा बंगलादेशविरुद्ध पराजय बेहोरेको छ । उसले पहिलो खेलमा श्रीलंकालाई ५-० र दोस्रो खेलमा भुटानलाई ३-० गोल अन्तरले हराएको थियो ।
आज नै हुने दोस्रो खेलमा बंगलादेश र श्रीलंका खेल्ने छन् । यी दुई टोलीबीचको खेल साँझ ७ बजेदेखि सुरु हुनेछ । श्रीलंकालाई हराए बंगलादेश फाइनल पुग्नेछ । श्रीलंका र भुटान भने फाइनल दौडबाट बाहिरिसकेका छन् ।
