- अनन्तश्री राजगुरु जगतगुरु वीरेन्द्र परम्हंश ज्योतिषाचार्य
आजको पञ्चाङ्ग
श्रीशाके १९४४ नेपाल सं.११४३ शरद ऋतु वि.सं. २०७९ कार्तिक २२ गते मंगलबार तद्अनुसार सन् २०२२ नोभेम्बर ८ तारिख कार्तिक शुक्ल पक्षको पूर्णिमा तिथि भरणी नक्षत्र व्यतिपात योग बालव करण आनन्दादियोगमा मुशल योग चन्द्रमा मेष राशिमा भ्रमणशील रहनेछ । काठमाडौंमा सूर्योदय बिहान ६:२० बजे र सूर्यास्त साँझ १७:१३ बजे हुनेछ । कार्तिकस्नान चतुर्मास ब्रत समाप्ति, ग्रस्तोदित खग्रास चन्द्रग्रहण निम्बार्काचार्य जयन्ती, गुरुनानक जयन्ती । चन्द्रग्रहण साँझ ५:२७ देखि ६:३४ सम्म ।
ग्रहण प्रभाव : मेष- घात, वृष- खर्च, मिथुन- लाभ, कर्कट- सुख, सिंह- मान नास, कन्या- कष्ट, तुला- स्त्रीपीडा, वृश्चिक- सुख, धनु- चिन्ता, मकर- व्यथा, कुम्भ- श्रीप्राप्ति, मीन- क्षति । भरणी नक्षत्र मेष राशिको लागि अतिकष्ट ।
आजको राशिफल
मेष – बौद्धिक र सृजनात्मक काममा सफलता मिल्ने दिन छ । मनोरञ्जनपूर्ण समय ब्यतीत होला । पारिवारिक सुख मिल्नुका साथै अध्ययन-अध्यापनको क्षेत्रमा प्रगतिको खबर सुन्न पाउनुहुनेछ । सानातिना काम र घरेलु समस्यामा नै आजको समय व्यतीत भएपनि त्यसबाट राम्रो लाभ हुनेछ । इष्टमित्र एवम् सन्तानको सुख प्राप्त हुनेछ ।
वृष – आजको दिन आर्थिक पक्ष सुदृढ रहने र कर्मबल बढ्नेछ । बोली र व्यक्तित्वको प्रभाव बलियो रहला । न्यायिक, कानुनी वा प्रतियोगितात्मक क्रियाकलापमा विजय प्राप्त हुनेछ । तथापि, मनमा दोधारको अवस्था सिर्जना हुनसक्छ । यात्रामा सोचेजस्तो रमाइलो नहुन सक्छ । खानपानमा नियन्त्रण गर्नुहोला । घरपरिवारको स्थिति अनुकूल रहला ।
मिथुन – आयबल बढ्ने र साझेदारीको काममा सफलता मिल्ने दिन छ । आरोग्य वृद्धि होला । रसरागमा रुचि बढ्नेछ । पारिवारिक सहयोग प्राप्त हुनेछ । दुर्गमस्थान र टाढाको यात्रा सम्भावना छ तर अनावश्यक यात्राबाट जोगिनु राम्रो हुन्छ । मनोरञ्जन पूर्ण समय रहेको छ । कामधन्दा र व्यवसायको चापले गर्दा प्रेम वा दाम्पत्य सम्बन्धमा चिसोपन देखिन सक्छ । दायित्व पूरा गर्नुहुनेछ ।
कर्कट – भावनामा केन्द्रित भएर व्यवहार गर्दा बोलीको विपरीत अर्थ लाग्न सक्छ । आजको दिन बोली र व्यवहारलाई नियन्त्रणमा राख्नुहोला । नचिताएको स्थानबाट धनागमनको संकेत देखिन्छ । शरीर फूर्तिलो भएको महसुस हुनेछ । सुखसमृद्धि बढ्नेछ । यात्रामा सफलता प्राप्त होला । मानसम्मान प्राप्ति र ख्याति फैलिने योग रहेको छ ।
सिंह – आजको दिन पारिवारिक वातावरण तपाईंको अनुकूल नभए पनि शरीरमा उत्साह र उमङ्ग प्राप्त हुनेछ । स्वास्थ्य सबल रहनेछ र काममा पनि फाइदाको योग छ । प्रतिस्पर्धी परास्त हुनेछन् । उद्योग र व्यापारमा विशेष फाइदाको योग छ । आफन्तसित भेटघाट हुनेछ । सन्तान पक्षबाट सुख प्राप्त हुनेछ । शत्रुमाथि विजय प्राप्त हुनेछ ।
कन्या – भाग्यबल वृद्धि भइ मनोकूलको काममा सफलता मिल्नेछ । पढाइलेखाइमा प्रगति हुनेछ । बौद्धिक प्रतिस्पर्धामा विजयी भइनेछ । चुनौतीका बाबजुद नसोचेको काम बन्न सक्छ । जीवनसाथी, सन्तति वा विपरीतलिङ्गी साथीसँग सम्बन्ध आत्मीय बन्ने योग छ । रोकिएको काम बन्नुसँगै नयाँ काम पनि बन्नेछ । आयस्रोत बढ्ला । रसविलासमा रुचि बढ्नेछ । यात्रामा सफलता हासिल हुनेछ ।
तुला – आज ठूलाबडाको आशीर्वादले रोकिएको काम बन्न सक्छ । आर्थिक लाभ प्राप्त होला । सहयोगीहरूले साथ दिनेछन् र काममा सोचेजस्तै सफलता मिल्नेछ । आफन्तको सहयोग समर्थन प्राप्त होला । रोग र शत्रुसित लड्ने क्षमता बढ्नेछ । मन प्रशन्न रहला ।
वृश्चिक – हृदयमा प्रेमभाव बढ्नेछ । आज धैर्य र विवेकले काम गर्नु राम्रो हुनेछ । आफन्तको सहयोग बढ्ला । साथीसित भेटघाट होला । रोकिएका काम सम्पादन हुनेछन् । कसैसंग सामान्य झगडा पनि हुन सक्छ, सचेत रहनुहोला । बौद्धिक र रचनात्मक कार्यमा सफल हुनुसँगै गीतसंगीतमा पनि आकर्षण बढ्नेछ । आमोदप्रमोदमा रमिरहनु हुनेछ ।
धनु – आज ब्यस्तता बढेको महसूस होला । बौद्धिक र रचनात्मक काममा सफलता मिल्नेछ । सामाजिक उत्तरदायित्व वहन गर्ने समय छ । कतै लामो दूरीको लाभदायी यात्रा गर्नु छ भने आज राम्रो हुन्छ । अधिकार प्राप्तिका लागि गरिएको प्रतिस्पर्धामा विजयी भइने छ । शत्रुहरूको चलखेल बढे पनि तिनले तपाईंलाई हानी पुर्याउन सक्ने छैनन् । इष्टमित्र एवम् सन्तानबाट सुख प्राप्त हुनेछ । आइपरेको समस्याको समाधान गर्नुहुनेछ ।
मकर – पराक्रम र आरोग्यता बढ्नेछ । पारिवारिक सुख प्राप्त हुनेछ । उद्यम र परिश्रमको राम्रो प्रतिफल प्राप्त होला । आफूभन्दा वरिष्ठ व्यक्तित्वसँग सम्बन्धमा प्रगाढता आउला । आर्थिक पक्ष सबल नै छ र पनि समय बलियो नरहेकोले अति आवश्यक नपरेसम्म आजको दिन कुनै नयाँ बस्तु खरिद नगरेकै बेस हुनेछ । भोजन मिल्नेछ । रसरागमा रुचि बढ्ला । रचनात्मक कार्यमा सफलता पाउनुहुनेछ ।
कुम्भ – मान वृद्धि होला । रसरागको भाव वृद्धि हुनेछ । विशिष्ट व्यक्तिको विचारले प्रभावित तुल्याउन सक्छ । नोकरी अथवा व्यवसायसँग सम्बद्ध कुनै ठोस परिणाम देखा पर्नेछन् । चुनौती र अप्ठ्यारा हटाउन आज गरिएको प्रयास सफल हुनेछ । रमाइलो यात्राको सम्भावना छ र त्यसबाट दीर्घकालिक फाइदा पुग्नेछ । घरपरिवारको स्थिति अनुकूल रहनेछ । कार्यव्यवस्था क्षेत्रमा सफलता मिल्नेछ । आर्थिक पक्ष बलियो बन्ने छ ।
मीन – आयबल बढ्नेछ । बौद्धिक र रचनात्मक कार्य बन्नेछ । मीठो भोजन खान पाउनुहुनेछ । नयाँ काम र जिम्मेवारी हात पार्ने मौका छ । पढाइमा पनि राम्रै प्रगति हुनेछ । स्वास्थ्यमा समस्या देखा पर्ने देखिन्छ, सचेत रहनुहोला । आशा उत्साह बढ्नेछ । समयले साथ दिनेछ ।
