मुगु, चैत २७ गते । जिल्लाको छायानाथ रारा नगरपालिकाका २ , ३ र ५ नं वडाका अति विपन्न र ज्येष्ठ नागरिकले आधुनिक चुलो पाएका छन् । उनीहरूलाई नगरपालिका र सहयोगी हातहरूको समूह (सहास नेपाल) ले ११६ परिवारलाई आधुनिक चुलो वितरण गरेका हुन् ।
परम्परागतको चुलोले विपन्न परिवारका सदस्यलाई स्वास्थ्यमा असर पारेकोले स्वास्थ्यमा सुधार ल्याउने उद्देश्यले विपन्न परिवारलाई चुलो वितरण गरेको बताइएको छ ।
छायानाथ रारा नगरपालिका वडा नं २ का वडा अध्यक्ष परेगराज चौलागाइले नगरका ज्येष्ठ नागरिक, एकल महिला र अन्य दलित महिलाको स्वास्थ्यमा सुधार ल्याउने उद्देश्यले धुवाँरहित चुलोको वितरण गरिएको बताउनुभयो । छायानाथ रारा नगरपालिकाको ३० हजार रुपियाँ र सहास नेपालको आर्थिक सहयोगमा ५५ हजार रुपियाँ गरी कुल ८५ हजारको लागतमा धुवाँरहित चुलो सहयोग गरिएको हो ।
छायानाथ रारा नगरपालिका वडा नं २ का स्थानीय धनलाल तिरुवाले परम्परागत तरिकाको चुलोबाट खाना पकाउँदा हामी दमरोगीका बिरामीलाई स्वास्थ्यमा सारै असहज हुने गरेकोमा अहिले सहज भएको बताउनुभयो ।
स्थानीय दामुकला तिरुवा आधुनिक चुलोबाट खाना पकाउँदा घरभित्रको वातावरण नै सफा देखिएको बताउनुभयो । ‘पूरै घर नै धुवाँले स्वास्थ्यमा असर पर्ने देखि, घरको कपडा, भाँडाकुँडा सबै बिग्रन्थे, अहिले सफा देखिन थालेका छन्, यसले कामको भार कम गराएको छ,’ उहाँले भन्नुभयो ।
सहास नेपालका कार्यक्रम संयोजक राजकुमार थापाले नगरपालिकाको वाड नं २,३ र ५ को अल्फा करेसाबारी कृषक समूहका ६६ वटा घरधुरी त्यसै गरी तलितुम हिमाली कृषक समूहमा २६ घरधुरी र हातेमालो महिला समूहमा २३ गरी कुल एक सय १६ वटा घरधुरीका लाई आधुनिक चुलो वितरण गरिएको बताउनुभयो ।
