काठमाडौँ । प्रमुख प्रतिपक्षी नेकपा (एमाले) का सांसद भीमप्रसाद आचार्यले सरकारले अझै पूर्णता पाउन नसकेकोमा आपत्ति जनाएका छन् ।
आज (मंगलबार) को प्रतिनिधिसभा वैठकमा बोल्दै उनले सरकार बनेको ६ महिना हुन लाग्दा पनि पूर्णता पाउन नसक्नु लाजमर्दो विषय भएको उनको टिप्पणी गरे । बैठकमा विशेष समय लिएर बोल्दै सांसद आचार्यले सरकारलाई पूर्णता दिने काम कति वर्षमा पूरा हुन्छ ? भनेर सत्तारुढ गठबन्धनलाई कटाक्ष गरेका हुन् ।
उनले सरकारलाई संसदप्रति जवाफदेही हुन पनि सचेत गराए । सरकारले आफ्ना कार्ययोजना संसदमा प्रष्ट ढंगले राखेर अघि बढनुपर्ने उनको माग थियो । ‘वर्तमान सरकार धेरै अलमलिइरहेको देखिराखेका छौँ । यो सरकाले अहिलेसम्म पूर्णता पाउन सकेको छैन । लाजमर्दो अवस्था के हो भने सरकार र यसका अंगले झण्डै आधा वर्षसम्म भइसक्दा पूर्णता नपाउने, मन्त्रालय खाली हुने, जनताले सेवा नपाउने, मर्कामा पर्ने, विकास अलपत्र हुने अवस्था छ’, उनले भने, ’मेरो एउटा प्रश्न छ हामी मन्त्री र प्रधानमन्त्रीजीहरुका भाषण सुनिरहेका छौँ, यो गर्छौ, त्यो गर्छौं । प्रधानमन्त्री र गठबन्धनका नेताहरुले सरकारलाई कति वर्ष लगाएर पूर्णता दिनु हुन्छ ?’
उनले सरकारले पूर्णता नपाउँदा विकासको काम पनि हुन नसकेको बताए । ‘सरकार विस्तार र विकासको काम गर्न कति दशक लाग्छ कि वर्ष लाग्छ कि वा शताब्दी लाग्छ ? उत्तर चाहियो’, उनले थपे, ‘यो संसद सरकार बनाउन प्रधानमन्त्रीलाई भोट हाल्ने ठाउँ मात्रै होइन । संसद सरकारको जवाफदेहिता लिने ठाउँ हो। सरकारले आफ्ना कार्ययोजना यहाँ प्रष्ट सार्वजनिक गर्नुपर्छ । जे मन लाग्यो त्यही गर्ने । देशलाई बन्धक बनाएर जाने छुट कसैलाई छैन ।’
