काठमाडौँ । जनता प्रगतिशील पार्टी नेपालका अध्यक्ष हृदयेश त्रिपाठीले कात्तिक महिनाभित्र काँग्रेस-एमालेको सरकार बन्ने दाबी गरेका छन् ।
गृह जिल्ला नवलपरासीमा त्रिपाठीले शुक्रबार जिल्लाका पत्रकारहरूसँग कुराकानी गर्दै यस्तो बताएका हुन् ।
वर्तमान गठबन्धन सरकार लामो समय नटिक्ने बताउँदै उनले कात्तिक महिनाभित्र काँग्रेस र एमालेको नयाँ सरकार बन्ने दाबी गरे ।
संविधानका केही प्रावधान फेरबदल गर्ने सोचमा काँग्रेस र एमाले रहेको उनको दाबी छ । ‘काँग्रेस र एमालेका वर्तमान नेतृत्व संविधानका कतिपय विषयमा असन्तुष्ट रहेकाले त्यसलाई फेरबदल गर्नका लागि ती दुई पार्टी मिलेर सरकार बनाउँछन् । त्यो कात्तिक महिनाभित्रै हुन्छ ।’ उनको भनाई छ ।
यी दुई ठुला पार्टी मिलेर सरकार बनाए पनि देशमा राजनीतिक स्थिरता भने नरहने उनले ठोकुवा गरे।
