बुटवल । जेनजी आन्दोलनको क्रममा रुपन्देहीमा एक शिक्षकले गरेको अनुशासनहीन कार्यले समाजमा निकै चर्चा पाएको छ। बुटवलस्थित भाटभटेनी सुपर मार्केटमा आइसक्रिम चोरी गरेको तस्बिर सार्वजनिक भएपछि कालिका मानवज्ञान स्कुलले आफ्नै शिक्षकलाई बर्खास्त गरेको छ।
शुक्रबार सार्वजनिक भएको फोटामा विद्यालयका शिक्षक शिवशंकर शुक्ला जेनजी आन्दोलनमा सहभागी भई भीडको आवरणमा आइसक्रिम चोरी गरेको देखिन्छ। घटनापछि सामाजिक सञ्जालमा व्यापक आलोचना भएपछि विद्यालय प्रशासन दबाबमा परेको थियो।
विद्यालयका प्राचार्य दिनेश थापाले भदौ २४ गतेको प्रदर्शनमा शुक्ला सहभागी भई अनियमित गतिविधि गरेको प्रमाणित भएकाले उनलाई तत्काल कारबाही गरिएको जानकारी दिए। उनले भने, “विद्यालयको आचरण संहिता र शिक्षकको जिम्मेवारी विपरीत कार्य भएकाले शुक्लालाई आजैदेखि बर्खास्त गरिएको छ।”
यो घटनाले शिक्षकमाथि समाजले राख्ने विश्वासमाथि प्रश्न उठाएको छ। शिक्षण पेसालाई नै कलंकित बनाउने गरी गरिएको कामले विद्यार्थी, अभिभावक र समुदायलाई निराश बनाएको भन्दै अभिभावकहरूले पनि असन्तोष प्रकट गरेका छन्।
यता, जेनजी आन्दोलनको नाममा गरिएका तोडफोड र लुटपाटका गतिविधिहरूले आन्दोलनको उद्देश्यलाई नै कमजोर बनाइरहेको विश्लेषकहरूको मत छ। शान्तिपूर्ण आन्दोलनलाई बदनाम गर्ने यस किसिमका घटनामाथि कानुनी कारबाही हुनुपर्ने आवाज पनि बढ्दै गएको छ।
