कपिलबस्तु, असोज ३ गते । संविधान दिवस तथा राष्ट्रिय दिवसको अवसरमा कपिलवस्तु जिल्लाको तौलिहवामा नेकपा (एमाले) कपिलवस्तु नगर कमिटीले विशेष कार्यक्रम आयोजना गरि मनाएको छ ।
“संविधानको रक्षा, संघीयता, लोकतान्त्रिक गणतन्त्र, सामाजिक न्याय र समावेशी शासन प्रणालीको प्रतिरक्षा“ भन्ने नारा सहित उक्त दिवस मनाइएको हो ।
सो अवसरमा बोल्दै नेकपा एमाले कपिलबस्तुका जिल्ला अध्यक्ष बाबुराम खनालले संविधानले संघीय लोकतान्त्रिक गणतन्त्रात्मक शासन प्रणालीलाई संस्थागत गरेको उल्लेख गर्दै यसको रक्षा, कार्यान्वयन र मजबुतीकरण सबैको साझा दायित्व भएको बताए । उनले सामाजिक न्याय, समावेशी शासन र जनताको अधिकार सुनिश्चित गर्न संविधानलाई व्यवहारमा उतार्नु पर्नेमा जोड दिए ।
कार्यक्रममा एमाले नेता खुम आचार्यले संविधानको महत्व, यसको कार्यान्वयन र लोकतन्त्रको सबलीकरणका विषयमा आफ्ना विचार राखेका थिए । बाल मन्दिरको सभाहालमा आयोजना गरिएको कार्यक्रममा नेकपा (एमाले) कपिलवस्तु नगर कमिटीका अध्यक्ष श्याम प्रकाश प्रजापतिको अध्यक्षतामा सम्पन्न भएको छ । श्याम सुबेदीको सञ्चालनमा भएको कार्यक्रममा रुपैया खातुनको स्वागत मन्तव्यमा भएको थियो ।
कार्यक्रममा एमाले नेतृ सरिता आचार्य, स्थानीय जनप्रतिनिधि, पार्टीका नेताकार्यकर्ता, सामाजिक अभियन्ता, युवाहरु र सर्वसाधारणको उल्लेख्य उपस्थिति रहेको थियो ।
संविधान दिवस हरेक वर्ष असोज ३ गते देशभर विभिन्न कार्यक्रमसहित मनाइँदै आएको छ ।
कपिलवस्तुमा नेकपा एमाले नगरद्वारा संविधान दिवस विशेष कार्यक्रम
