काठमाडौँ – जापान सरकारले नेपाललाई सहयोग गरेको एस्ट्राजेनेका खोप साउन २३ र २४ गते काठमाडौँ ल्याइने भएको छ । कोभ्याक्स सुविधामार्फत उपलब्ध गराएको १६ लाख एस्ट्राजेनेका खोप काठमाडौँ ल्याइने भएको हो ।
१६ लाख मात्रा खोप दुई चरणमा ल्याउन लागेको हो । जसमा पहिलो चरणको खोप आगामी शनिबार र दोस्रो चरणको खोप आइतबार आउने छ । स्वास्थ्य तथा जनसंख्या राज्यमन्त्री उमेश श्रेष्ठले ट्वीट गर्दै दुई चरणमा साउन २३ र २४ गते उक्त खोप नेपाल आइपुग्ने जानकारी दिएका हुन्।
कोभिशिल्डका पहिलो डोज खोप लगाएका साढे १३ लाख जेष्ठ नागरिकलाई एष्ट्राजेनेका खोप लगाइने छ । सरकारले अक्सफोर्ड अस्ट्राजेनेकाले विकास गरेको र भारतको सेरम इन्स्च्यिूटले उत्पादन गरेको कोभिडसिल्ड खोप साढे १३ लाख जेष्ठ नागरिकलाई गत चैतमा नै लगाइसकेको छ।
दोस्रो मात्रा १२ सातामा लगाउनुपर्ने भएपनि भारत खरीदको खोप उपलब्ध नगराउँदा उनीहरुलाई एस्ट्राजेनेका खोप लगाउने निर्णय यस अघि नै स्वास्थ्य तथा जनसंख्या मन्त्रालयले गरिसकेको छ।
