साझा न्यूज । तौलिहवा (कपिलस्तु)
नेपाली कांग्रेसको आसन्न गाउं नगर, क्षेत्र र जिल्ला अधिवेशनमा अत्यन्त शौहार्द, मित्रवत र सर्वसम्मत ढंगबाट नेतृत्व चयनको प्रयास गर्न सम्पुर्ण अगुवा कांग्रेस नेता कार्यकर्ताहरु समक्ष नेपाली कांग्रेसकी नेतृ तथा प्रदेश सभा सदस्य रिना नेपालले आग्रह गरेकी छिन् ।
नेतृ नेपालले जिल्लाका १० वटै स्थानीय तहको अधिवेशनमा नेतृत्व लिन प्रतिस्पर्धामा उत्रिएका आकांक्षीहरुलाई सके सर्वसम्मत नसके प्रजातान्त्रिक अभ्यास गर्दै निर्वाचनबाट नेतृत्व लिन शुभकामना समेत व्यक्त गरेकी छिन् ।
यो आन्तरिक प्रतिस्पर्धा हो, साझा न्यूजसंग कुरा गर्दै नेतृ नेपालले भनिन्, “जसले जिते पनि कांग्रेस नै जित्ने हो ।” त्यस कारण पनि हामी सवै सौहार्दपूर्ण वातावरण्मा आन्तरिक प्रतिस्पर्धा गरौं, उनले भनिन् । नेपाली कांग्रेसको निर्वाचन सकिए लगत्तै स्थानीय, प्रदेश र संघीय निर्वाचन हुने भएका कारण सवै कांग्रेसजनले आफ्नो आन्तरिक निर्वाचनलाई सौहार्दपूर्ण बनाउन जरुरी रहेको उनले बताईन् ।
नेतृ नेपालले जिल्लाका सवै बुथबाट निर्वाचित भएका बुथ सभापति, प्रदेश प्रतिनिधी र बुथ ईकाई समितिका पदाधिकारीहरुलाई बधाई समेत ज्ञापन गरेकी छिन् ।
