नारायणगढ । चितवन नेपालको राजनीतिको केन्द्र बनिरहेको छ । सत्तारुढ माओवादी र प्रतिपक्ष एमालेका कारण चितवन राजनीतिको केन्द्र बनेको हो । यसैबीच सिपी मैनाली नेतृत्वको नेकपा (माले)को आठौं महाधिवेशन पनि चितवनमै हुने भएको छ । यही कात्तिक २७ गतेदेखि २९ गतेसम्म चितवनको नारायणी कला मन्दिरमा महाधिवेशन गर्न लागिएको हो । व्यवस्थापन समितिले पत्रकार सम्मेलन मार्फत् महाधिवेशनको तयारी अन्तिम चरणमा पुगेको जानकारी दिएकोछ ।
समितिका संयोजक दीननाथ घिमिरेका अनुसार महाधिवेशनका लागि आवश्यक सबै प्रक्रिया पूरा भइसकेको छ । मालेका महासचिव सिपी मैनालीले उद्घाटन गर्ने महाधिवेशनमा देशभरका ३५० प्रतिनिधि सहभागी हुने पत्रकार सम्मेलनमा जानकारी दिइयो । यसअघि नेकपा एमालेले चितवनमा मंसिर १० बाट महाधिवेशन गर्ने तय गरिसकेको छ ।
त्यसअगाबै मालेले चितवनमै महाधिवेशन गर्ने जनाएको हो । गत वैशाखमा गर्ने भनिएको महाधिवेशन कोरोना कहरका कारण सारिएको भन्दै उनले स्वास्थ्य मापदण्ड पालनाका लागि थोरै प्रतिनिधिका बीच महाधिवेशन गर्न लागिएको जानकारी दिए ।
यस महाधिवेशनले ७५ सदस्यीय केन्द्रीय समिति निर्वाचित गर्नेछ । सोही समितिले पोलिटब्यूरो सदस्य, स्थायी कमिटी र महासचिव निर्वाचित गर्नेछ ।
महाधिवेशनमा नेपालको क्रान्तिको कार्यक्रम (नयाँ जनवाद), राजनीतिक प्रतिवेदन, नेपाल चिन्तन, मालेको सङ्गठनात्मक प्रस्ताव–प्रतिवेदनमाथि छलफल गर्नेछ । यस्तै, पार्टीको तत्कालीन कार्यनीति, अर्थनीति, राष्ट्रिय–अन्तर्राष्ट्रिय प्रस्ताव, पार्टीको विधान (परिमार्जनसहित पारित गर्ने) घिमिरेले जानकारी दिए ।
‘महाधिवेशनमा प्रादेशिक संरचनाको विषयमा छलफल हुनेछ,’ उनले भने ।
प्रदेशका संरचना हटाएर स्थानीय तह र जिल्लालाई अधिकार दिने विषयमा विशेष निर्णय गरिने उनले बताए ।
