कपिलबस्तु, मङसिर ३ गते । कपिलबस्तुमा पदीय मर्यादा विपरित कार्य गर्ने एक मतदान अधिकृतलाई जिम्मेवारीबाट पदमुक्त गरिएको छ । जिल्लाको क्षेत्र नं ३ (२) को कृष्णनगर नगरपालिका ४ मा रहेको श्री गणेश आधारभूत विद्यालयका मतदान अधिकृत वेद प्रसाद पन्थीलाई जिम्मेवारीबाट पदमुक्त गरिएको हो ।
निर्वाचन अधिकृतको कार्यालय, चन्द्रौटा, कपिलवस्तुुका अधिकृत प्रकाश मरासिनीको नेतृत्वमा गएको अनुगमन टोलीले पन्थीलाई पदमुक्त गरेको हो । पन्थीलाई कार्तिक २२ गतेदेखी मतदान अधिकृत पदमा नियुक्त गरिएको थियो ।
कपिलबस्तु निर्वाचन क्षेत्र नं. ३ का निर्वाचन अधिकृत प्रकाश मरासिनीका अनुसार अधिकृत पन्थीले निर्वाचनको कार्य सम्पादन गर्दा उच्चस्तरको नैतिक आचरण विपरितक कार्य गरेको हुनाले मतदान अधिकृतको जिम्मेवारीबाट पदमुक्त गरिएको बताउनुभयो । प्रतिनिधि सभा सदस्य तथा प्रदेश सभा सदस्य निर्देशिका २०७९ दफा ८३(१) बमोजिम पन्थिलाई पदमुक्त गरिएको उहाँले बताउनुभयो । उक्त मतदान केन्द्रमा यमलाल न्यौपानेलाई मतदान अधिकृत पदमा नियुक्त गरिएको निर्वाचन अधिकृत मरासिनीले बताउनुभयो ।
निर्वाचन अधिकृतको कार्यालयबाट निर्वाचन सम्बन्धी कार्यका लागि खटाइएका मतदान अधिकृत लगायतका सम्पूर्ण कर्मचारीहरुलाई तोकिएको जिम्मेवारी इमान्दारीपूर्वक निर्वाह गर्न निर्वाचन अधिृकत मरासिनीले निर्देशन समेत दिनुभएको छ । यदी कसैले मर्यादा विपरित कार्य गरेको पाइए निर्वाचन कानून बमोजिम कारवाही गरिने उहाँको भनाई छ ।
पदीय मर्यादा विपरित कार्य गर्ने मतदान अधिकृत पदमुक्त
