उर्लाबारी, चैत १५ गते । मोरङको पथरीशनिश्चरे नगरपालिकाले नगरमा निर्माण गरिरहेको आधुनिक बधशाला (पशु काट्ने घर) निर्माण भइसके पनि उपकरणको अभावमा प्रयोगमा आउन सकेको छैन ।
कोशी प्रदेश सरकारको पशुपंक्षी निर्देशनालयको पशु बधस्थल निर्माण सुधार कार्यक्रमअन्तर्गत नगरको १ नम्वर वडामा बधशाला निर्माण गरिएको थियो । पशुबध गर्ने घर निर्माण भएको दुई वर्ष बित्नै लाग्दा प्रयोगमा आउन सकेको छैन ।
नगरका प्रमुख प्रशासकीय अधिकृत लक्ष्मीप्र्रसाद खरेलले बधशाला भित्र आवश्यक पर्ने उपकरण खरिद गर्ने बजेट अभाव हुँदा काम रोकिएको बताउनुभयो । पथरी बजारको गोसलाइनमा निर्माण भएको बधशाला निर्माणका लागि प्रदेश सरकारले ५० लाख रुपियाँ अनुदान दिएको थियो । छिमेकी नगरपालिकाको साझेदारीसहित कूल ७५ लाख १४ हजार ४५१ रुपियाँमा लागतमा बधशाला निर्माण गर्ने योजना बनेको थियो । तर निर्माण कम्पनी मादी आरकेडा कन्ट्रक्सन इटहरीले ५० लाख ९३ हजार ५७९ रुपियाँमा बधशाला (घर) निर्माण गरेर नगरलाई जिम्मा लगाइसकेको छ ।
बधस्थलमा दैनिक ठूला पाँच वटा र साना १२ वटासम्म पशुवध गर्न र प्रशोधन गर्न सकिने छ । वडा नं.१ का वडाध्यक्ष भीमकुमार राईले भन्नुभयो, ‘‘बधशालामा भित्र पशुको स्वास्थ्य परीक्षण, बध गरेपछि प्रशोधन, फ्रिजिङ गर्ने लगायतका सुबिधा हुनेछन् ।’’
उहाँले भित्रका प्राविधिक उपकरण जडानका लागि अझै १०/११ रुपियाँ आवश्यक पर्ने बताउनुभयो । स्थानीय मासु व्यापारीहरूसँगको सहकार्यमा भित्रको प्राविधिक काम सक्ने र चाँडै बधशाला प्रयोगमा ल्याउने उहाँको भनाइ छ । तर प्रमुख प्रशासकीय अधिकृत लक्ष्मीप्रसाद खरेलले प्रदेशको आयोजना सम्पन्न गर्न प्रदेश सरकारले बजेट नपठाउँदा बधशाला सञ्चालनमा ल्याउन नसकिएको बताउनु भयो ।
खरेलले भन्नुभयोे, ‘‘नगरले निर्णय गरेर आफ्नै खर्चमा पनि उपकरण गर्न सक्छ । स्रोतको अभावका कारण नगरले तत्काल लगानी गर्न सक्ने अवस्था छैन ।’’ प्रदेशको आयोजनामा नगरले बेवास्ता गर्दा दुई वर्ष अघि निर्माण सम्पन्न बधशालाका झ्यालका सिसा फुट्न थालेका छन् भने ग्रील भत्किएको छ छ । त्यस्तै, सटरमा तीनपत्र खिया लागेको छ ।
पथरीबजारमा खुला रुपमा खसी, बोका, सुँगुर/बंगुर, राँगा/भैंसी काट्ने गरिन्छ । मासु व्यवसायीहरूका अनुसार पथरी बजारमा दैनिक सुँगुर, राँगा ३/३ वटा र खसी, बोका ६/७ वटा बध हुने गरेको छ ।
