तौलिहवा, चैत २१ गते । जिल्ला प्रशासन कार्यालय कपिलबस्तुले विद्युतीय राहदानीको अनलाईन फाराम कार्यालयबाट नै भर्ने जनाएको छ । अहिले सम्म राहदानी बनाउन आउने सेवा ग्राहीहरुले विद्युतीय राहदानीको अनलाईन फाराम बहिराबाट चर्को शुल्क तिरी भर्दै आएका थिए ।
सेवाग्राहीहरुबाट बहिराको फोटो स्डुडियो लगायत अन्य पसलहरुबाट दुई देखि पाँच हजार सम्म लिने गरेको स्थानिय बताउछन् । जिल्ला प्रशासनले कार्यालयबाट विद्युतीय राहदानीको अनलाईन फाराम भर्ने भएपछि सेवाग्राही खुशी भएका छन् ।
सेवा प्रवाहलाई सरलीकरण तथा सहजीकरण गर्न बुधबार देखि अर्को व्यवस्था नभएसम्म प्रशासन कार्यालयबाटै विद्युतिय राहदानीको प्रत्यक्ष अनलाईन आबेदन फाराम भरिने भएको सहायक प्रजिअ अनिल पौडेलले बताउनुभयो । अनलाईन फारामका लागि सेवाग्राही स्वयम् कार्यालयमा उपस्थित भई विद्युतिय राहदानी मंगलबार देखि विहिबारसम्म कार्यालय समय भित्र नाम नामेसी टिपाई सेवा प्रवाह समय कार्ड लिई जानु पर्ने उहाँले बताउनुभयो ।
विद्युतीय राहदानीको अनलाईन फारामका लागि नागरिकता सक्कल, राष्ट्रिय परिचयपत्र, राहदानी लिएको भए राहदानी, नाबालकको हकमा नाबालक परिचयपत्र (बुवा र आमाको नेपाली नागरिकता तथा विवाहदर्ता प्रमाणपत्र) सक्कल, बसाई सराई गरेको हकमा बसाई सराई दर्ता प्रमाणपत्र सक्कल, विवाहितको हकमा विवाह दर्ता प्रमाणपत्र सक्कल र अन्य आवश्यक कागजातहरु चाहिने सहायक प्रजिअ पौडेलले बताउनुभयो ।
सेवा प्रवाह गर्दा पहिलो उपस्थित हुनेलाई पहिलो प्राथमिकता र अपाङ्ग तथा अशक्तलाई विशेष प्राथमिकता दिइने उहाँको भनाई छ । जिल्ला प्रशासनबाट आर्थिक वर्ष ०७९।०८० मा साउन देखि फागुन मसान्त सम्ममा ८ हजार ९७५ जनाले राहदानी लिएका छन् ।
