नेपाली काङ्ग्रेसले राष्ट्रियसभाको अध्यक्ष पदमा कृष्ण सिटौलालाई चयन गर्ने भएको छ । आगामी माघमा राष्ट्रिय सभाको रिक्त १९ स्थानका लागि निर्वाचन हुँदैछ । उक्त निर्वाचनमा वर्तमान सत्ता-गठबन्धनबीच चुनावी एकता हुने निश्चित मानिन्छ ।
भागबण्डामा काङ्ग्रेसलाई नौ सदस्य मिल्ने भएको छ । नौमध्ये कृष्ण सिटौला, गोपालमान श्रेष्ठ र आनन्द ढुङ्गानाको नाम तय भइसकेको बुझिएको छ र, अन्य नाम तय गर्ने अन्तिम अभ्यास भइरहेको छ ।
कानूनअनुसार प्रतिनिधिसभाको समानुपातिक उम्मेदवार बनाइने (बन्द)सूचिमा परेका गोपालमान श्रेष्ठ र आनन्द ढुङ्गानाको नाम काङ्ग्रेसले निर्वाचन आयोगलाई पत्राचार गरी बन्द सूचिबाट हटाउन लगाएको छ । र, काङ्ग्रेसले यससम्बन्धी पत्र पनि निर्वाचन आयोगबाट प्राप्त गरिसकेको छ ।
उन्नाइस रिक्त स्थानमा सत्ता गठबन्धनसम्बद्ध दलका उम्मेदवारहरूले विजय प्राप्त गर्ने अवस्था छ । त्यसो भएमा राष्ट्रियसभाको अध्यक्ष काङ्ग्रेसले पाउनेछ र, सो पदमा सिटौलालाई चयन गर्ने वचन देउवाले दिनुभएको बुझिएको छ ।-घटना र विचारबाट
