कपिलवस्तु, जेठ २४ गते । जिल्लाको कपिलबस्तु नगरपालिका वडा नं. ८ स्थित दोहनी शिव मन्दिर प्रांगणमा आजदेखि नौ दिवसीय लक्ष्मी नारायण महायज्ञ संगीतमय कथा तथा भव्य रामलीला कार्यक्रम सुरु भएको छ । धार्मिक, सांस्कृतिक र सामाजिक समृद्धिका लागि आयोजना गरिएको यस महायज्ञको शुभारम्भ भव्य कलश शोभा यात्रासहित गरिएको हो ।
महायज्ञ जेठ २३ गतेदेखि सुरु भई पूर्णाहुति जेठ ३१ गते गरिने आयोजक समितिले जानकारी दिएको छ । यस अवसरमा श्री बिमल दास जी महाराज, जानकी घाट बड़ा स्थान अयोध्या (भारत) बाट सहभागी भएका छन् भने कथा वाचन भारतकी अर्चना मिश्राद्वारा गरिंदैछ ।
समस्त क्षेत्रवासीको आयोजनामा सम्पन्न भइरहेको यस धार्मिक कार्यक्रमका समिति अध्यक्ष शत्रुधन चौधरी, संरक्षक उपेन्द्र पाण्डेय, उपाध्यक्ष जयराम तेली, कोषाध्यक्ष पुरुषोत्तम गिरी, सह–सचिव सन्तोष गुप्ता र सदस्य चिनक बढई रहेका छन् ।
समितिका अध्यक्ष शत्रुधन चौधरीले भने, “धार्मिक कार्यक्रम मार्फत समाजमा धार्मिक चेतना र सामाजिक एकता फैलाउनु हामी सबैको कर्तव्य हो । यस्तो आयोजनाले युवा पुस्तालाई संस्कृति र संस्कार प्रति आकर्षित गर्न सहयोग पु¥याउँछ । सम्पूर्ण श्रद्धालुहरूलाई कार्यक्रममा सहभागी भई पुण्य लाभ लिन हार्दिक आमन्त्रण गर्दछु ।“
आयोजकका अनुसार कार्यक्रम अन्तर्गत दैनिक संगीतमय कथा, रामलीला तथा विविध आध्यात्मिक गतिविधिहरू सञ्चालन हुने छन्, जसबाट स्थानीय समुदायमा धार्मिक तथा सांस्कृतिक जागरणको सन्देश फैलिने विश्वास गरिएको छ ।
दोहनीको शिव मन्दिर प्रांगणमा नौ दिवसीय लक्ष्मी नारायण महायज्ञ सुरु
