कपिलवस्तु । कपिलवस्तु प्रहरीले छुट्टाछुट्टै घटनामा लागुऔषध (ब्राउन सुगर) सहित चार जनालाई नियन्त्रणमा लिएको छ ।
विहिबार दिउँसो वाणगंगा नगरपालिका–८ ढोडेकोलस्थित सकुन्तला मानन्धरको घरमा प्रहरीले गरेको चेकजाँचमा १ ग्राम २३० मिलिग्राम ब्राउन सुगर बरामद भएको जिल्ला प्रहरी कार्यालय कपिलवस्तुले जनाएको छ ।
सो क्रममा घर मालिक सकुन्तला (२६) र सोही ठाउँकी सन्तोष भन्ने नर बहादुर पुन (३४) लाई पक्राउ गरिएको हो । प्रहरीका अनुसार बरामद गरिएको ब्राउन सुगर सानो बट्टाभित्र प्लाष्टिकको पुडिया बनाएर लुकाइ राखिएको अवस्थामा भेटिएको हो । साथै, लु ४१ प ३०२५ नम्बरको स्कुटर पनि नियन्त्रणमा लिइएको छ ।
त्यसैगरी शनिबार दिउँसो कपिलवस्तु नगरपालिका–११ अडौराकोटमा लागुऔषध कारोबार भइरहेको भन्ने सूचनाका आधारमा इलाका प्रहरी कार्यालय पिपराबाट खटिएको टोलीले दुई जनालाई पक्राउ गरेको हो ।
अडौरा निवासी प्रभाकर धोबी (२३) को साथबाट ५३० मिलिग्राम र वाणगंगा–११ बरहवा निवासी सागर पासी (१९) को साथबाट १ ग्राम ५७० मिलिग्राम गरी जम्मा २ ग्राम १०० मिलिग्राम ब्राउन सुगर बरामद गरिएको प्रहरीले जनाएको छ ।
पक्राउ परेकाहरूमाथि लागुऔषध (ब्राउन सुगर) सम्बन्धी मुद्दामा जिल्ला अदालत कपिलवस्तुबाट २० दिनको म्याद थप भई थप अनुसन्धान भइरहेको जिल्ला प्रहरी कार्यालयले जानकारी दिएको छ ।
