साझा न्यूज । कपिलवस्तु
कपिलवस्तु, ३० जेठ । नेकपा माओवादी केन्द्रका नेता दिपक पाण्डेयको हत्याका थप कडीहरु खुल्दै गएका छन् । हत्यामा प्रयोग गरिएको हतियार प्रहरीले बरामद गरेको छ । कपिलवस्तु नगरपालिका वडा नं. २ आनन्दवाग कैलाश टोलका ३३ वर्षीय पुर्ण वीर पाल्पालीको घरबाट प्रहरीले सो हतियार बरामद गरेको हो ।
कपिलवस्तु नगरपालिका वडा नंं. २ का ३३ वर्षीय शाकीर अली पखियाले नेता पाण्डेय उपर गोली प्रहार गरे पछि सो हतियार पाल्पालीको घरमा राखेका थिए । प्रहरीले घटनामा संलग्न रहेको आरोपमा अनुसन्धानका लागि पाल्पाली सहित ५ जनालाई पक्राउ गरेको छ ।
पक्राउ परेका व्यक्तिहरु उपर अनुसन्धान भईरहेका कारण प्रहरीले उनीहरुको पहिचान खुलाएको छैन । अनुसन्धान पछि चाडै नै पत्रकार सम्मेलन मार्फत उनीहरुलाई सार्वजनिक गरिने प्रहरी नायब उपरीक्षक धर्मराज भण्डारीले बताए ।
सो हतियार खरिद विक्रीमा संलग्न अन्य व्यक्तिहरुको पनि प्रहरीले पहिचान गरी खोजी कार्य शुरु गरेको छ । हतियार खरिद विक्रीमा संलग्न रहेको आरोपमा प्रहरीले अनुसान्धान लागि उनीहरुलाई पक्राउ गरेको हो । ५ जना उपर अनुसन्धान शुरु गरेका छौं, अन्य कुरा चाडै नै सार्वजनिक गर्छौ, प्रहरी नायब उपरीक्षक भण्डारीले भने ।
नेता पाण्डेयको हत्यामा संलग्न रहेको आरोपमा प्रहरीले यस अघि नै कपिलवस्तु नगरपालिका वडा नं. १ का ३९ वर्षीय ओम प्रकाश यादव र कपिलवस्तु नगरपालिका वडा नं. २ का ३३ वर्षीय शाकिर अलि पखियालाई पक्राउ गरी अनुसन्धान शुरु गरेको छ ।
