काठमाडौँ । नेकपा एमालेका अध्यक्ष केपी शर्मा ओलीले उद्घाटन गर्ने भनिएको पर्साको जगरनाथपुर गाउँपालिकाको कार्यालय उद्घाटन कार्यक्रम गाउँपालिकाकी उपाध्यक्षसहित २६ जना जनप्रतिनीधिहरुले बहिस्कार गरेका छन् । उपाध्यक्षसहित २६ जना जनप्रतिनिधिहरुले उक्त कार्यक्रमको विषयमा गाउँपालिकामा कुनै छलफल नभइ तय भएको कारण आफूहरुले बहिस्कार गरेको जनाएको छ ।
उनीहरुले उक्त कार्यक्रम गर्ने विषयमा माइनोट नै गरेका छन् । उनीहरुले गरेको माइनोटमा गाउँपालिकाको भवन निर्माणमा आर्थिक अनियमितता गरेको आरोपसमेत लगाइएको छ ।
त्यस्तै कार्यालय उद्घाटन कार्यक्रममा गाउँपालिकाकै उपाध्यक्षलाई जानकारी नगराइएको र आफुले अरुलाई पठाएको निमन्त्रणा कार्डबाट थाहा पाएको उपाध्यक्ष विशमिल्लाह खातुनले नागरिक खबरसँग बताइन् । । एमाले अध्यक्ष ल्याएर गर्न खोजिएको उक्त उद्घाटन कार्यक्रम कार्यपालिका बैठकमा कुनै छलफल नभएको उनले बताइन् ।
कार्यालय उद्घाटन कार्यक्रम सर्वसंवत रुपमा छलफल नै नगरी मनोमानी ढंगले गर्न खोजेको भन्दै कार्यक्रममा कोही पनि उपस्थित नहुने निर्णय गरेको खातुनले बताइन् ।
नेकपा एमाले अध्यक्ष एवम् पूर्व प्रधानमन्त्री केपी शर्मा ओलीले आज कार्यालय उद्घाटन गर्ने कार्यक्रम तय भएको छ । खातुनका अनुसार उक्त कार्यक्रमकै लागि गाउँपालिकाभित्रका विद्यालय बन्द गरेर शिक्षक, विद्यार्थी तथा अभिभावकलाई पनि कार्यक्रममा उपस्थित हुन गाउँपालिकाको शिक्षा शाखाले निर्देशन जारी गरेको छ ।
उपाध्यक्ष खातुनसहित वडा नम्बर २ का वडाअध्यक्ष प्रभु प्रसाद कुर्मी, वडा नम्बर ३ का वडाअध्यक्ष नगीना राउत अहिर, वडा नम्ब्र ५ का वडाअध्यक्ष बिहारी महतो नुनिया, कार्यपालिका, सदस्य, वडा सदस्य लगायत २६ जना जनप्रतिनीधिहरुले उक्त कार्यक्रम बहिस्कार गरेका हुन् ।
