नेपालगञ्ज, चैत १५ गते । पश्चिम नेपालका तीन प्रदेशका विरामीका लाग रेफरल अस्पतालको रुपमा रहेको भेरी अस्पताल नेपालगञ्जलाई चिकित्सा विज्ञान राष्ट्रिय प्रतिष्ठान (न्याम्स) को आंगिक अस्पतालको रुपमा शैक्षिक कार्यक्रम सञ्चालन गर्न स्वीकृत प्राप्त भएको छ ।
सो स्विकृति प्राप्त भएसंगै अब भेरी अस्पतालमा एमडी र एमएसको पढाई हुने अस्पतालका प्रमुख डा. बद्री चापागार्इंले बताउनुभयो । उहाँका अनुसार संघीय अस्पताल भए पनि यसअघि भेरी अस्पतालमा शैक्षिक कार्यक्रमहरु सञ्चालन हुन पाएका थिएनन् ।
यो स्विकृतिपछि वीर अस्पतालमा एमडी÷एमएस अध्ययनका लागि विद्यार्थी भर्ना भए पनि अध्ययन भने उनीहरुले भेरी अस्पतालमा गर्ने डा. चापागाईंले बताउनुभयो ।
भेरी अस्पतालको मातहतमा उनीहरुले एमडी÷एमएसको अध्ययन पूरा गर्ने जनाउँदै उहाँले यसबाट भेरी अस्पतालको सेवा प्रवाहमा गुणात्मक सुधार आउने दावी गर्नुभयो ।
एमडी डाक्टरले बिरामीलाई गुणस्तरीय सेवा दिने भएपछि शैक्षिक एवं अनुसन्धानका गतिविधिहरु बढ्ने भेरी अस्पतालका सूचना अधिकारी डा. संकेत रिसालले बताउनुभयो ।
न्याम्सको आंगिक अस्पताल कायम गरी शैक्षिक गतिविधि सञ्चालनका लागि गत फागुन २२ गते भेरी अस्पतालका प्रमुख डा. चापागाईंले स्वास्थ्य तथा जनसंख्या मन्त्रालयलाई पत्र पठाउनुभएको थियो ।
त्यसको करिव तीन सातापछि सरकारले शैक्षिक गतिविधि सञ्चालनका लागि भेरी अस्पताललाई स्वीकृति दिएको डा. रिसालले जानकारी दिनुभयो ।
भेरी अस्पतालमा केही समय अघिकेही विषयहरुमा एमडी/एमएस कार्यक्रम अन्तर्गत रेजिडेन्टहरुको पोष्टिङ गरिए पनि त्यो नियमित हुन सकेको थिएन ।
कोभिड महामारीपछि सो अस्पतालले आफ्नो सेवा प्रवाहलाई निरन्तर गुणस्तरीय र सरलीकृत बनाउँदै लगेको छ ।
पाँच सय शैयाको अस्पताल बनाउने गरी अगाडि बढेको अस्पतालले आफ्नो सेवा प्रवाहलाई बिरामीमैत्री र प्रविधिमैत्री बनाउँदै लगेको अस्पतालका वरिष्ठ फिजिशियन डा. राजन पाण्डेले बताउनुभयो ।