रामपुर (पाल्पा), साउन १५ गते । रामपुर नगरपालिकाले स्थानीय पाठ्यक्रममा आधारित “हाम्रो रामपुर” पाठ्यपुस्तक निर्माण गर्न तयारी थालेको छ । स्थानीय पाठ्यक्रम लागु भएको दुई वर्षपछि पाठ्यपुस्तक निर्माण गर्न लागेको हो ।
नगरभित्रका वडा तथा बस्तीको भूगोल, धार्मिक, ऐतिहासिक तथा पुरातात्विक महत्वका विषय संगै आर्थिक, समाजिक, सांस्कृतिक पक्षलाई समेटेर कक्षा १ देखि ८ सम्मका विद्यार्थीहरुको लागि पाठ्यपुस्तक तयार गर्न लागेको हो । नगरपालिकाले स्थानीय पाठ्यपुस्तक तथा सन्दर्भ सामग्री निर्माणका लागि कार्यदल गठन गठन गरेको थियो ।
कार्यदलले नगरका १० वटै वडामा पुगेर वडा तथा बस्तीको भूगोल, ईतिहास , स्थानीय सरकार, सांस्कृतिक सम्पदा, वन वातावरण तथा सरसफाई , स्थानीय आर्थिक विकासका आधार तथा पर्यटन, सामाजिक विकास, स्थानीय विकासका पूर्वाधार, विपद व्यवस्थापन र सुरक्षा गरी ८ वटा विषवस्तुमा आधारित रहेर सूचना संकलन गरेको स्थानीय पाठ्यपुस्तक लेखन कार्यदलका संयोजक देवराज देवकोटाले बताउनुभयो । वडाबासीको प्रत्यक्ष सहभागितामा हरेक बस्तीको यथार्थ वस्तुस्थिति बारे जानकारी संकलन गरिएको देवकोटाले बताउनुभयो ।
संकलित सूचनाको आधारमा विषयवस्तु छनौट गरी पाठ्यपुस्तक तथा सन्दर्भ सामग्री लेखन कार्यलाई अगाडी बढाउने कार्यदलले जनाएको छ । नगरपालिकाले शैक्षिक सत्र २०८० मा स्थानीय पाठ्यक्रम निर्माण गरेर लागू गरेको थियो । पाठ्यपुस्तकको आवश्यकता महशुस गरेर यस वर्ष निर्माणको तयारी थालिएको शिक्षा शाखा अधिकृत विकल काफ्लेले बताउनुभयो । पाठ्यक्रम कार्यान्वयन र प्रभावकारी कक्षा शिक्षणका लागि पाठ्यपुस्तक सहित सन्दर्भ सामग्री निर्माण गर्न लागेको हो ।
पठनपाठनमा एक रुपता ल्याउनका लागि स्थानीय पाठ्यपुस्तक तथा सन्दर्भ सामग्री निर्माण गर्न लागिएको नगरपालिका प्रमुख रमण बहादुर थापाले बताउनुभयो । स्थानीय वस्तुस्थितिको बारेमा जानकारी दिन पाठ्यक्रम लागु गरेर पाठ्यपुस्तक निर्माणको काम सुरु गरेको थापाले बताउनुभयो । स्थानीय शिक्षकहरुको सक्रियता र स्थानीय व्यक्तिहरुसंग सूचना संकलन गरी सबैको सहभागितामा तयार पारिएको पुस्तक वस्तुनिष्ठ, विश्वसनीय र प्रभावकारी हुने भएकाले स्थानीय शिक्षकहरुलाई नै परिचालन गरिएको जानकारी दिनुभयो ।
उपप्रमुख बाल कुमारी थापाले पाठ्यक्रम लागू भए पनि पाठ्यपुस्तक नहुँदा शिक्षक विद्यार्थीलाई पठन पाठनमा असहज भएका कारण पुस्तक तथा सन्दर्भ सामग्री निर्माण गर्न लागेको बताउनुभयो । प्रवक्ता कपिल बहादुर खाँणले नगर भित्र रहेका जातजाति, भाषा, संस्कृति लगाएत स्थानीय विषय बारे अभिलेख सहित विद्यार्थीहरुलाई शिक्षण र भावि पुस्तालाई अध्ययन गर्न पाठ्यपुस्तक महत्वपूर्ण हुने बताउनुभयो ।
