कपिलवस्तु । कपिलवस्तुका विभिन्न सीमावर्ती क्षेत्रबाट सशस्त्र प्रहरीले १४ लाख रुपैयाँभन्दा बढी मूल्यका अवैध सामान बरामद गरेको छ ।
सशस्त्र प्रहरी बल, नेपाल नं. २८ गण हेडक्वार्टर कपिलवस्तुबाट खटिएको टोलीले लत्ताकपडा, मोटर पार्ट्स, डाल्डा घ्यू, आतिसबाजी (पटका) तथा सामान ओसारपसारमा प्रयोग भएको भारतीय स्कार्पियो गाडीसहित १४ लाख ३१ हजार ९३० रुपैयाँ बराबरका सामान बरामद गरेको हो ।
बरामद गरिएका सामान आवश्यक कारबाहीका लागि सम्बन्धित निकायमा बुझाइएको सशस्त्र प्रहरी बल नेपाल नं. २८ गणका गणपति सशस्त्र प्रहरी उपरीक्षक गोपाल अधिकारीले जानकारी दिनुभयो ।
उहाँका अनुसार सीमावर्ती क्षेत्रमा हुने अवैध चोरी पैठारी नियन्त्रण गर्न सशस्त्र प्रहरीले निगरानी तथा गस्तीलाई तीव्रता दिएको छ । खुला सीमाको फाइदा उठाउँदै हुने अवैध गतिविधि नियन्त्रण गर्न सीमा क्षेत्रमा सुरक्षा सतर्कता बढाइएको उहाँले बताउनुभयो ।
“सीमावर्ती क्षेत्रमा हुने अवैध चोरी पैठारी नियन्त्रणका लागि सशस्त्र प्रहरी निरन्तर परिचालित छ । अवैध रूपमा सामान भित्र्याउने तथा ओसारपसार गर्ने गतिविधिमा संलग्नमाथि निगरानी बढाउँदै कानुनअनुसार कारबाही अघि बढाइनेछ,” उपरीक्षक अधिकारीले भन्नुभयो ।
सशस्त्र प्रहरीले सीमा क्षेत्रमा हुने अवैध आयात–निर्यात तथा चोरी पैठारी नियन्त्रण अभियानलाई थप प्रभावकारी बनाइने जनाएको छ ।
